Election Announced : केंद्रीय निवडणूक आयोगाने गुरुवारी एक मोठी घोषणा करत बिहार, मध्य प्रदेश आणि गुजरात या तीन राज्यांमधील विधानसभेच्या रिक्त झालेल्या तीन जागांसाठी पोटनिवडणुकीचा (Election Announced) कार्यक्रम जाहीर केला आहे.

या मतदारसंघांमध्ये आगामी ३० जुलै रोजी मतदान पार पडणार असून ३ ऑगस्ट रोजी मतमोजणी केली जाईल. निवडणूक आयोगाने हा अधिकृत निवडणूक कार्यक्रम घोषित करताच संबंधित मतदारसंघांमध्ये तात्काळ प्रभावाने (Election Announced) आदर्श आचारसंहिता लागू करण्यात आली आहे.

‘या’ 3 जागांवर होणार पोटनिवडणूक

निवडणूक आयोगाने दिलेल्या माहितीनुसार, बिहारमधील बांकीपूर, मध्य प्रदेशातील दतिया आणि गुजरातमधील मांजलपूर या तीन विधानसभा मतदारसंघांमध्ये ही पोटनिवडणूक घेतली जाणार आहे. या तिन्ही जागा वेगवेगळ्या कारणांमुळे रिक्त झाल्या होत्या.

बिहारची बांकीपूर विधानसभा जागा भाजपचे ज्येष्ठ नेते नितीन नवीन यांनी आपल्या पदाचा राजीनामा दिल्यामुळे रिक्त झाली होती. तर दुसरीकडे, मध्य प्रदेशातील दतिया मतदारसंघाचे आमदार राजेंद्र भारती हे कायदेशीर कारणांमुळे अपात्र ठरल्याने ती जागा रिक्त झाली होती. तसेच, गुजरातमधील मांजलपूर मतदारसंघाचे आमदार योगेशभाई पटेल यांचे निधन झाल्यामुळे या जागेवर पोटनिवडणूक घ्यावी लागत आहे.

असा असेल सविस्तर निवडणूक कार्यक्रम

केंद्रीय निवडणूक आयोगाने या पोटनिवडणुकीचे संपूर्ण वेळापत्रक (Election Announced) निश्चित केले आहे. या कार्यक्रमानुसार, आगामी ६ जुलै रोजी पोटनिवडणुकीची अधिकृत अधिसूचना (नोटिफिकेशन) प्रसिद्ध केली जाईल. त्यानंतर इच्छुक उमेदवारांना आपले अर्ज दाखल करण्यासाठी १३ जुलै ही शेवटची तारीख देण्यात आली आहे.

दाखल झालेल्या उमेदवारी अर्जांची छाननी १४ जुलै रोजी केली जाईल, तर १६ जुलै ही उमेदवारी अर्ज मागे घेण्याची अंतिम मुदत असेल. यानंतर ३० जुलै रोजी प्रत्यक्ष मतदानाची प्रक्रिया पार पडेल आणि ३ ऑगस्ट रोजी मतमोजणी करून निकाल जाहीर केला जाईल. ही संपूर्ण निवडणूक प्रक्रिया ४ ऑगस्टपर्यंत पूर्ण करण्याचे आदेश आयोगाने दिले आहेत.

मतदार याद्या आधीपासूनच तयार

निवडणूक आयोगाने स्पष्ट केले आहे की, या तिन्ही विधानसभा मतदारसंघांमधील मतदारयाद्यांचे अद्ययावतीकरण आधीपासूनच पूर्ण झालेले आहे. यामध्ये बांकीपूरची अंतिम मतदारयादी ३० सप्टेंबर २०२५ रोजी प्रसिद्ध करण्यात आली होती, तर दतिया येथील मतदारयादी २१ फेब्रुवारी रोजी आणि मांजलपूर येथील मतदारयादी १७ फेब्रुवारी रोजी आधीच प्रसिद्ध करण्यात आली आहे. त्यामुळे प्रशासन आता संपूर्ण ताकदीने मतदानाच्या तयारीला लागले असून राजकीय पक्षांमध्येही आतापासूनच हालचाली गतिमान झाल्या आहेत.