छत्रपती संभाजीनगर : शिवसेनेचे नेते आणि छत्रपती संभाजीनगरचे पालकमंत्री संजय शिरसाट यांच्या अडचणी वाढण्याची शक्यता आहे. 2024 च्या विधानसभा निवडणुकीत औरंगाबाद पश्चिम मतदारसंघातून पराभूत झालेले शिवसेना (उद्धव बाळासाहेब ठाकरे) पक्षाचे उमेदवार राजू शिंदे यांनी शिरसाट यांच्या निवडीला आव्हान देणारी याचिका मुंबई उच्च न्यायालयाच्या औरंगाबाद खंडपीठात दाखल केली आहे.

या याचिकेवर गुरुवारी (7 ऑगस्ट ) न्या. किशोर संत यांच्यासमोर सुनावणी झाली, मात्र शिरसाट यांच्या वकिलांनी उत्तर दाखल करण्यासाठी वेळ मागितल्याने पुढील सुनावणी सप्टेंबरच्या पहिल्या आठवड्यात होणार आहे.

राजू शिंदे यांनी ॲड. सिद्धेश्वर ठोंबर यांच्यामार्फत दाखल केलेल्या याचिकेत शिरसाट यांच्या निवडीवर प्रश्नचिन्ह उपस्थित केले आहे. दुसरीकडे, शिरसाट यांच्यावतीने ज्येष्ठ विधिज्ञ ॲड. राजेंद्र देशमुख यांनी बाजू मांडताना याचिकेतील त्रुटींचा मुद्दा उपस्थित करत ती फेटाळण्याची मागणी केली. तसेच, दस्तऐवजावर आधारित दावा नोंदवण्याची विनंतीही केली. शिरसाट यांच्या वकिलांना ॲड. मुकुल कुलकर्णी, ॲड. अमोल जोशी, ॲड. अभयसिंह भोसले आणि ॲड. श्रीराम देशमुख यांनी सहकार्य केले.

2024 च्या निवडणुकीत शिरसाटांचा दणदणीत विजय

2024 च्या विधानसभा निवडणुकीत संजय शिरसाट यांनी औरंगाबाद पश्चिम मतदारसंघातून सलग चौथ्यांदा विजय मिळवला होता. त्यांनी शिवसेना (उबाठा) चे उमेदवार राजू शिंदे यांचा 16,351 मतांनी दणदणीत पराभव केला होता. मात्र, या विजयाला राजू शिंदे यांनी न्यायालयात आव्हान दिल्याने शिरसाट यांच्यासमोरील राजकीय संकट वाढले आहे. सप्टेंबरमधील सुनावणी या प्रकरणात महत्त्वाचा टप्पा ठरणार असून, त्याचा परिणाम शिरसाट यांच्या राजकीय भवितव्यावर होऊ शकतो.