Eknath Shinde : महाराष्ट्राच्या राजकारणातून (Eknath Shinde) पुन्हा एकदा अत्यंत खळबळजनक आणि मोठी बातमी समोर येत असून, शिवसेना उद्धव बाळासाहेब ठाकरे गटाला पुन्हा एक मोठा धक्का देण्याची तयारी दिल्लीत पूर्ण झाली आहे.

गेल्या काही महिन्यांपासून शांत असलेले ‘ऑपरेशन टायगर’ आता पुन्हा एकदा वेगाने सक्रिय झाले असून, ठाकरे गटाचे खासदार आगामी काळात ‘नॉट रिचेबल’ होण्याची दाट शक्यता वर्तवली जात आहे.

उपमुख्यमंत्री आणि शिवसेना शिंदे गटाचे मुख्य नेते एकनाथ शिंदे (Eknath Shinde) यांनी नुकत्याच केलेल्या दिल्ली दौऱ्यादरम्यान ही संपूर्ण रणनीती आखल्याची जोरदार चर्चा राजकीय वर्तुळात सुरू झाली आहे.

या संपूर्ण घडामोडींमागे एकनाथ शिंदे यांनी ७ जून रोजी दिल्लीत घेतलेली एक ‘अतिगुप्त’ बैठक कारणीभूत असल्याचे सांगितले जात आहे. या बैठकीची बातमी समोर येताच महाराष्ट्राच्या राजकीय वातावरणात मोठी खळबळ उडाली आहे.

सूत्रांनी दिलेल्या माहितीनुसार, ठाकरे गटाच्या एकूण ९ खासदारांपैकी तब्बल ७ खासदार या बैठकीला उपस्थित होते. हा नवीन राजकीय भूकंप उद्धव ठाकरे यांच्यासाठी अत्यंत चिंताजनक मानला जात आहे.

केंद्रीय मंत्रिपदाची ‘ऑफर’ आणि खासदार फोडण्याची रणनीती

आगामी काळात होणाऱ्या केंद्रीय मंत्रिमंडळ विस्ताराचा फायदा उठवत ठाकरे गट पूर्णपणे खिळखिळा करण्यासाठी शिंदे गटाने (Eknath Shinde) जोरदार कंबर कसली आहे. पक्षांतर करण्यास उत्सुक असलेल्या या ७ खासदारांपैकी एका वरिष्ठ खासदाराला थेट ‘मोदी मंत्रिमंडळात’ स्थान दिले जाणार असल्याची चर्चा आहे.

यामध्ये विशेषतः मराठवाड्यातील एका बड्या खासदाराच्या नावाची मोठी चर्चा असून, उर्वरित खासदारांनाही दिल्लीत महत्त्वाची व मानाची पदे देण्याचे थेट आश्वासन एकनाथ शिंदे यांच्याकडून देण्यात आले आहे.

धक्कादायक बाब म्हणजे, या सर्व गुप्त घडामोडी आणि बैठका शिंदे गटाचे केंद्रीय मंत्री प्रतापराव जाधव यांच्या दिल्लीतील शासकीय निवासस्थानी पार पडल्याचे उघड झाले आहे.

‘ऑपरेशन टायगर’साठी श्रीकांत शिंदेंची ६ महिन्यांची छुपी फिल्डिंग

हे ‘ऑपरेशन टायगर’ अचानक घडलेले नसून, यासाठी गेल्या ६ महिन्यांपासून अत्यंत गुप्त आणि चोख रणनीती आखली जात होती. उपमुख्यमंत्री एकनाथ शिंदे आणि खासदार श्रीकांत शिंदे हे दोघेही गेल्या सहा महिन्यांपासून ठाकरे गटाच्या या असंतुष्ट खासदारांच्या सातत्याने संपर्कात होते.

विशेषतः खासदार श्रीकांत शिंदे यांनी दिल्लीत या खासदारांच्या वैयक्तिक भेटीगाठी घेऊन त्यांचे मन वळवण्यात महत्त्वाची भूमिका बजावली. दरम्यानच्या काळात, भाजपने या फोडाफोडीच्या राजकारणाला ‘तूर्तास’ स्थगिती देण्यास सांगितले होते; मात्र ७ जून रोजी एकनाथ शिंदे यांनी अचानक दिल्ली गाठून या संपूर्ण ‘मिशन’ला अंतिम रूप दिले असल्याचे समजत आहे.

कोणते खासदार होणार ‘नॉट रिचेबल’?

सध्याच्या घडीला लोकसभेत उद्धव ठाकरे गटाचे एकूण ९ खासदार आहेत. सूत्रांच्या दाव्यानुसार, मुंबईतील २ खासदार वगळता उर्वरित सर्व ७ खासदार उद्धव ठाकरेंची साथ सोडून शिंदे गटात सामील होण्याच्या तयारीत आहेत. दिल्लीतील या ७ खासदारांसोबतची बैठक यशस्वी झाल्यानंतर, एकनाथ शिंदे यांनी थेट केंद्रीय गृहमंत्री अमित शहा यांची भेट घेतली आणि या संपूर्ण ‘ऑपरेशन’वर अंतिम शिक्कामोर्तब करून घेतले.

या संभाव्य घडामोडींमध्ये केवळ ठाकरे गटाचे खासदारच नव्हे, तर स्वतः खासदार श्रीकांत शिंदे यांचीही केंद्रीय मंत्रिमंडळात वर्णी लागण्याची दाट शक्यता वर्तवली जात आहे. यामुळे एकीकडे शिंदे (Eknath Shinde) गटात प्रचंड उत्साहाचे वातावरण निर्माण झाले असताना, दुसरीकडे ‘मातोश्री’वर मात्र चिंतेचे ढग जमा झाले आहेत. आता हा राजकीय भूकंप प्रत्यक्षात कधी येतो आणि महाराष्ट्राच्या राजकारणाला कोणते नवीन वळण मिळते, याकडे संपूर्ण राज्याचे लक्ष लागून राहिले आहे.