Eknath Shinde : ठाकरेंचे अत्यंत विश्वासू नेते विधानपरिषदेचे आमदार सचिन अहिर यांच्या शिंदेसेनेतील प्रवेशानंतर आता ठाकरे गटाला आणखी एक मोठा धक्का बसण्याची शक्यता वर्तवली जात आहे. सूत्रांच्या माहितीनुसार, ठाकरे गटातील विधान परिषदेचे आमदार सुनील शिंदे यांना शिंदे सेनेकडून आपल्या गोटात आणण्यासाठी प्रयत्न सुरू आहेत.

सचिन अहिर यांची २०२२ मध्ये विधान परिषदेसाठी निवड झाली होती. त्यावेळी शिवसेना एकसंघ होती आणि ते धनुष्यबाण या चिन्हावर निवडून आले होते. त्यामुळे त्यांच्या पक्षांतरावर कायदेशीर आक्षेप घेणे ठाकरे गटासाठी तुलनेने कठीण ठरत असल्याची चर्चा आहे.

याच धर्तीवर सुनील शिंदे यांचीही २०२१ मध्ये विधान परिषदेसाठी निवड धनुष्यबाण चिन्हावर झाली होती. त्यामुळे त्यांनाही शिंदे गटात आणण्याचा प्रयत्न सुरू असल्याची माहिती सूत्रांनी दिली आहे. ठाकरे गटातील विधान परिषदेच्या उर्वरित पाच आमदारांमध्ये सुनील शिंदे हे महत्त्वाचे नाव मानले जाते. त्यांचा कार्यकाळ २०२७ पर्यंत असल्याने त्यांचे राजकीय महत्त्व अधिक वाढले आहे.

विशेष म्हणजे, वरळी मतदारसंघात ठाकरे गटाची ताकद कमी करण्याच्या रणनीतीचाही हा भाग असल्याची राजकीय वर्तुळात चर्चा आहे. सचिन अहिर यांच्या पक्षप्रवेशानंतर त्यांना विधान परिषदेच्या उपसभापतीपदाची जबाबदारी मिळण्याचीही शक्यता व्यक्त केली जात आहे. शिंदेसेनेत दाखल होताच एकनाथ शिंदे यांनी सचिन अहिर यांना विधानपरिषदेच्या उपसभापती पदाची उमेदवारी दिली. हा एकनाथ शिंदेंचा मास्टरस्ट्रोक मानला जातो.

हेही वाचा :  Benjamin Netanyahu: “…तर इराणवर पुन्हा हल्ला करू शकतो” ; बेंजामिन नेतान्याहू यांच्या विधानाने गोंधळ

सुनील शिंदेंनी व्यक्त केली नाराजी

दरम्यान, सचिन अहिर यांच्या पक्षांतरानंतर सुनील शिंदे यांनी पक्ष नेतृत्वावर अप्रत्यक्ष नाराजी व्यक्त केली. एका वृत्तवाहिनीसोबत  बोलताना ते म्हणाले, “आमच्या पक्षाच्या वरिष्ठांनी आत्मपरीक्षण करायला हवं होतं. सचिन अहिर यांच्या हालचालींची मला कल्पना होती. मात्र मी एक छोटा कार्यकर्ता असल्याने त्यावर उघडपणे भाष्य करू शकलो नाही.”

सुनील शिंदे यांच्या या वक्तव्यानंतर त्यांच्या पुढील राजकीय भूमिकेबाबतही विविध तर्कवितर्कांना उधाण आले आहे. मात्र त्यांनी अद्याप पक्षबदलाबाबत कोणतीही अधिकृत भूमिका जाहीर केलेली नाही. त्यामुळे आता नेमकं पुढे काय घडणार याकडे राजकीय वर्तुळाचे लक्ष लागले आहे. उबाठा गटासाठी आता राजकीय वाट आणखी बिकट करण्याचा चंगच एकनाथ शिंदेंनी बांधलेला दिसत असल्याचे गेल्या काही दिवसांत घडलेल्या घडामोडींमधून दिसत आले आहे.

कोण आहेत सुनील शिंदे?

सुनील शिंदे हे शिवसेना (उद्धव बाळासाहेब ठाकरे) गटाचे ज्येष्ठ नेते आणि विधान परिषदेचे आमदार आहेत. ते विशेषतः मुंबईतील वरळी परिसरातील राजकारणातील प्रभावी चेहरा म्हणून ओळखले जातात.

• ते मूळचे मुंबईतील शिवसेनेचे सक्रिय कार्यकर्ते असून पक्ष संघटनेत अनेक वर्षे काम केले आहे.
• त्यांनी मुंबई महापालिकेत नगरसेवक म्हणून काम केले असून नंतर महापौरपदाचीही जबाबदारी सांभाळली.
• २०२१ मध्ये ते शिवसेनेच्या धनुष्यबाण चिन्हावर महाराष्ट्र विधान परिषदेवर निवडून आले. त्यावेळी शिवसेना एकसंध होती.
• उद्धव ठाकरे यांचे निकटवर्तीय मानल्या जाणाऱ्या नेत्यांपैकी त्यांची गणना होते.
• मुंबईतील वरळी विधानसभा मतदारसंघ आणि पक्ष संघटनेत त्यांनी अनेक वर्षे महत्त्वाची भूमिका बजावली आहे.

हेही वाचा : Health Tips: गोड खायचंय? मग योग्य वेळ जाणून घ्या; नाहीतर वाढू शकतो मधुमेह आणि लठ्ठपणाचा धोका