कुणाल कामरा प्रकरणावरून सत्ताधारी चांगलेच आक्रमक झाले आहेत. कुणाल कामरावर अंधेरी पोलीस ठाण्यात गुन्हा दाखल झाला असून त्याच्यावर कठोर कारवाई करण्याचे निर्देश मुख्यमंत्री तथा गृहमंत्री देवेंद्र फडणवीसांनी दिले आहेत. कुणाल कामरावर कारवाई होणार असल्याने विरोधकांनीदेखील आक्रमक भूमिका घेतली आहे. यावेळी आमदार आदित्य ठाकरेंनी कुणाल कामराची बाजू घेतली असून त्याने कोणाचंही नाव घेतलेलं नसताना त्याच्यावर कारवाई का व्हावी, असा प्रश्न उपस्थित केला. यावर शिवसेना (एकनाथ शिंदे) पक्षाच्या महिला प्रवक्त्या मनीषा कायंदे यांनीदेखील आदित्य ठाकरेंवर टीका केली. काय म्हणाल्या मनीषा कायंदे? “सोन्याचा चमचा घेऊन जन्माला आलेल्या लोकांना रिक्षावाला मुख्यमंत्री बनल्याचं पाहवत नाहीय. शेतकऱ्यांचा मुलगा रिक्षावाला माणूस मुख्यमंत्री झाला हे पचनी पडत नाही. त्यामुळे कोणीतरी कॉमेडियन तयार करून बोलायला लावायचं. उद्या आम्हीही त्यांच्या घरात जाऊन अशाच शिव्या देतो आणि संविधान दाखवतो. अनेक व्यंगचित्रकार, कलाकार विविध माध्यमातून टीका करत असतात. पण कुणाल कामराने दबक्या आवाजात शिवीही दिलीय”, असं मनीषा कायंदे म्हणाल्या. “…मग मलिष्काचं गाणं का झोंबलं होतं?” आदित्य ठाकरेंनी कुणाल कामराचं समर्थन केल्याने मनीषा कायंदे म्हणाल्या, “मग मलिष्काने गाणं केलं होतं तेव्हा तुम्हाला का झोंबलं होतं? तेव्हा मिर्च्या का लागल्या. कंगना रणौत हिचं घर तोडलं होतं, ते का तोडलं होतं? याचं उत्तर द्यावं. कुणाल भामट्यामागे तुम्हीच आहात याचा तुम्हीच पुरावा देत आहात.” अशी टीका मनीषा कायंदे यांनी केली. आदित्य ठाकरे काय म्हणाले? “मला वाईट याचं वाटतं की एकनाथ शिदेंच्याच कार्यकर्त्यांनी ठरवून दिलं की गद्दार आणि चोर म्हणजे एकनाथ शिंदेच. कारण, कुमाल कामराने नाव कोणाचंही घेतलं नव्हतं. मग त्यांना मिर्ची लागायचं कारणच नव्हतं. पण त्यांनी ठरवंलय की आपला बॉस गद्दार आणि चोर आहे.” काय आहे कुणाल कामरा प्रकरण? कुणाल कामराने त्याच्या नव्या कॉमेडी शोमध्ये एका गाण्याच्या माध्यमातून महाराष्ट्राचे उपमुख्यमंत्री एकनाथ शिंदे यांच्यावर टिप्पणी केली. यानंतर रविवारी रात्री एकनाथ शिंदे यांच्या शिवसेनेने मुंबईतल्या खार येथे असलेल्या हॅबिटॅट कॉमेडी क्लबमध्ये तोडफोड केली. यामुळे सध्या राज्याचे राजकारण पेटले आहे. कोण आहे कुणाल कामरा? मूळचे मुंबईचे असलेले कुणाल कामरा यांना आज आपण स्टँडअप कॉमेडियन म्हणून ओळखत असलो, तरी त्यांच्या कारकिर्दीची सुरुवात ही ॲड एजन्सीमध्ये प्रॉडक्शन असिस्टंट म्हणून झाली. अॅडव्हर्टायजिंग इंडस्ट्रीमध्ये 11 वर्षे काम केल्यानंतर कुणाल कामरा यांनी स्टँडअप कॉमेडियन म्हणून करिअरला सुरुवात केली. 2013 मध्ये त्यांनी आपला पहिला शो सादर केला. 2017 साली त्यांनी रमित वर्मा यांच्या साथीने ‘Shut Up Ya Kunal’ हे युट्यूब पॉडकास्ट सुरू केलं. या कार्यक्रमात राजकीय नेते, सामाजिक कार्यकर्ते आणि अन्य क्षेत्रातील प्रसिद्ध व्यक्तींसोबत कुणाल कामरा अनौपचारिक शैलीत गप्पा मारतात. कामरा हे आपल्या राजकीय भूमिकांमुळेही अनेकदा चर्चेत राहतात. सोशल मीडियावरच्या त्यांच्या काही पोस्टमुळे वादही निर्माण झाले होते. आता ते पुन्हा एकदा वादात सापडले आहेत.
