Eknath Shinde | Health Update : राज्यातील नव्या सरकारचा शपथविधी सोहळा येत्या 5 नोव्हेंबरला पार पडणार आहे. यासाठी जोरदार तयारी केली जात आहे. असे असतानाच काळजीवाहू मुख्यमंत्री एकनाथ शिंदे यांना अशक्तपणा आला असल्याने त्यांना ज्युपिटर रुग्णालयात दाखल करण्यात आले आहे. त्यांची डेंग्यू आणि मलेरियाची चाचणी केली असता ते रिपोर्ट निगेटिव्ह आला आहे.

मात्र एकनाथ शिंदे यांच्या पांढऱ्या पेशी वाढल्याचं सांगण्यात आलं आहे. एमआरआय, एक्स रे करण्यात आला. त्यांना थोडा अशक्तपणाही आला होता. सध्या त्यांची प्रकृती आता ठीक असून, ते काम करु शकतात. अशी प्रतिक्रिया डॉक्टरांनी दिली आहे.

दरम्यान, ज्युपिटर रूग्णालयात चेकअप केल्यानंतर आणि काही तपासण्यानंतर एकनाथ शिंदे रुग्णालयातून बाहेर पडले. आणि यानंतर ते वर्षा बंगल्याकडे रवाना झाले. त्यामुळे पुन्हा एकदा शिंदे ॲक्शन मोडमध्ये आल्याचं दिसून येत आहेत.  गेल्या काही दिवसांपासून त्यांनी पक्षातील आमदारांच्या भेटी टाळल्या होत्या.

त्यानंतर आता एकनाथ शिंदे वर्षा बंगल्यावर पोहोचल्यानंतर पक्षातील इतर नेते आणि आमदार वर्षावर दाखल होण्यास सुरूवात झाली आहे. राज्यात परवा शपथविधी पार पडणार आहे, मात्र अद्याप जागावाटपाच्या बाबतीत पेच आहे, तो सोडवण्याचा देखील प्रयत्न केला जाऊ शकतो.

त्याचबरोबर शिंदे आपल्या आमदारांची बैठक घेऊन आगामी निर्णय घेऊ शकतात, अशी शक्यता वर्तवली जात आहे. सध्या एकनाथ शिंदेयांच्या भेटीसाठी पक्षातील नेते, आमदार वर्षा बंगल्यावर यायला सुरुवात झाली आहे. आमदार दिपक केसरकर, उदय सामंत, संजय शिरसाट, राहुल शेवाळे वर्षा निवासस्थानी असल्याची माहिती आहे. तर गुलाबराव पाटील वर्षावर दाखल झाले आहेत.