Eknath Shinde : शिवसेनेत पडलेल्या फुटीनंतर कोकण हा नेहमीच राजकीय संघर्षाचा मुख्य आखाडा राहिला आहे. नुकतेच ठाकरेंच्या सहा खासदारांना आपल्या पक्षात प्रवेश देऊन उपमुख्यमंत्री एकनाथ शिंदे (Eknath Shinde) यांनी ‘ऑपरेशन टायगर’ यशस्वी केल्याचा दावा केला होता.

मात्र, या मोठ्या घडामोडींनंतर आता कोकणातील स्थानिक राजकारणात दोन्ही पक्षांनी एकमेकांना जोरदार शह-प्रतिशह देण्यास सुरुवात केली आहे. एका बाजूला शिंदे गटाने (Eknath Shinde) ठाकरेंचा आणखी एक महत्त्वाचा मोहरा आपल्या गळाला लावला असताना, दुसरीकडे ठाकरे गटानेही शिंदे गटाला स्थानिक पातळीवर मोठा धक्का दिला आहे.

कुडाळमध्ये ठाकरे गटाचा पलटवार
खासदार फुटल्याच्या धक्क्यातून सावरत ठाकरे गट आता स्थानिक पातळीवर कमालीचा आक्रमक झाला आहे. सिंधुदुर्ग जिल्ह्यातील कुडाळ तालुक्यात ठाकरे गटाने शिंदे गटाला (Eknath Shinde) मोठा सुरुंग लावला आहे. शिंदे शिवसेनेचे ज्येष्ठ आणि वजनदार कार्यकर्ते बाळकृष्ण उर्फ बाळा पावसकर यांनी आज पुन्हा एकदा ठाकरे सेनेत प्रवेश केला. दोन वर्षांपूर्वी पावसकर यांनी ठाकरे गट सोडून शिंदे गटात प्रवेश केला होता, मात्र आता त्यांनी पुन्हा ‘मातोश्री’ची वाट धरली आहे.

माजी आमदार तथा जिल्हाप्रमुख वैभव नाईक यांच्या उपस्थितीत बाळा पावसकर यांचा हा पक्षप्रवेश पार पडला. सिंधुदुर्ग आणि कुडाळ परिसरातील स्थानिक राजकारणात पावसकर यांचा जनसंपर्क दांडगा असून, पक्षाची मोट बांधण्यात त्यांचा मोठा हात मानला जातो. त्यांचा हा प्रवेश शिंदे गटासाठी स्थानिक पातळीवर मोठा धक्का मानला जात आहे.

ठाकरे सेनेत प्रवेश करताच त्यांच्यावर कुडाळ तालुका प्रवक्तेपदाची महत्त्वाची जबाबदारी सोपवण्यात आली आहे. दोन दिवसांपूर्वीच शिंदेंनी ताकद वाढल्याचा दावा केला असताना, जमिनीवर मात्र शिंदे गटातून गळती सुरू झाल्याचे चित्र यावरून दिसत आहे.

रायगडमध्ये शिंदेंची सरशी
सिंधुदुर्गात लागलेल्या धक्क्याची कसर भरून काढत शिंदे गटाने रायगड जिल्ह्यात ठाकरे गटाला खिंडार पाडले आहे. श्रीवर्धन नगरपालिकेचे नगराध्यक्ष आणि रायगडमधील ठाकरे गटाचे अत्यंत महत्त्वाचे नेते अतुल चोगले यांनी शिंदे सेनेत प्रवेश करण्याचा निर्णय घेतला आहे.

अतुल चोगले हे रायगडमधील ठाकरे सेनेचा एक मजबूत चेहरा मानले जातात, त्यामुळे त्यांचे पक्षांतर ठाकरेंसाठी मोठा राजकीय फटका आहे. उपमुख्यमंत्री एकनाथ शिंदे यांच्या ‘नंदनवन’ या मुंबईतील शासकीय निवासस्थानी हा हायप्रोफाईल पक्षप्रवेश सोहळा पार पडणार आहे.

एकंदरीत, वरिष्ठ पातळीवर खासदारांची जुळवाजुळव करणाऱ्या शिंदे गटाला सिंधुदुर्गात नाईकांनी धक्का दिला आहे, तर रायगडमध्ये शिंदेंनी ठाकरेंची ताकद कमी केली आहे. कोकणातील हा ‘आयाराम-गयाराम’चा खेळ आगामी निवडणुकांच्या पार्श्वभूमीवर आणखी रंगतदार होण्याची चिन्हे आहेत.