Dum Laga Ke Haisha: ओटीटी प्लॅटफॉर्मवर जुने-नवे चित्रपट पुन्हा चर्चेत येत असतात. सध्या दम लगा के हईशा हा २०१५ साली प्रदर्शित झालेला चित्रपट तब्बल ११ वर्षांनंतर पुन्हा एकदा प्रेक्षकांच्या पसंतीस उतरला आहे. Netflix वर हा चित्रपट सध्या टॉप-५ मध्ये ट्रेंड करत आहे. साधी पण मनाला भिडणारी प्रेमकहाणी, उत्कृष्ट अभिनय आणि वास्तववादी मांडणी यामुळे हा चित्रपट पुन्हा चर्चेत आला आहे. हा चित्रपट प्रसिद्ध बॅनर यशराज फिल्म्स अंतर्गत तयार करण्यात आला होता. जवळपास १ तास ५० मिनिटांचा हा चित्रपट त्या वेळी बॉक्स ऑफिसवर हिट ठरला होता. आता ओटीटीवर नव्या पिढीतील प्रेक्षकही तो आवर्जून पाहत आहेत. काय आहे कथानक? चित्रपटाची कथा एका साध्या, थोड्या संकोची तरुणाभोवती फिरते. कुटुंबाच्या इच्छेनुसार त्याचे लग्न एका जाड्या (ओव्हरवेट) मुलीसोबत होते. सुरुवातीला तो या लग्नामुळे नाराज असतो आणि पत्नीपासून दुरावा ठेवतो. पत्नीला ही गोष्ट लक्षात येते आणि ती दुखावली जाते. अखेर ती माहेरी जाण्याचा निर्णय घेते. Dum Laga Ke Haisha यानंतर कथेत महत्त्वाच वळण येते. काही परिस्थिती अशा घडतात की दोघांमध्ये हळूहळू संवाद सुरू होतो. गैरसमज दूर होतात आणि एकमेकांविषयी समज व आपुलकी निर्माण होते. आत्मसन्मान, नात्यांतील गुंतागुंत आणि खरे प्रेम या सगळ्यांचा सुंदर मिलाफ या कथेत पाहायला मिळतो. शरीरयष्टीपेक्षा मनाची जुळवणूक अधिक महत्त्वाची असते, हा संदेशही चित्रपटातून दिला आहे. अभिनयाची जमेची बाजू या चित्रपटात आयुष्मान खुराना आणि भूमी पेडणेकर यांनी मुख्य भूमिका साकारल्या आहेत. विशेष म्हणजे हा भूमी पेडणेकर यांचा पहिलाच चित्रपट होता. त्यांच्या अभिनयाचे त्या वेळीही खूप कौतुक झाले होते. आयुष्मान खुराना यांनीही आपल्या साध्या, वास्तववादी अभिनयाने प्रेक्षकांची मने जिंकली. IMDb वर दमदार रेटिंग IMDb वर या चित्रपटाला ७.५/१० अशी चांगली रेटिंग मिळाली आहे. ही रेटिंग दाखवते की चित्रपट केवळ व्यावसायिकदृष्ट्या यशस्वी नव्हता, तर प्रेक्षकांच्या मनातही त्याने खास स्थान निर्माण केले आहे. आजच्या काळात जेव्हा मोठ्या बजेटचे, भव्य सेट्स असलेले चित्रपट येत आहेत, तेव्हा ‘दम लगा के हईशा’सारखी साधी, वास्तववादी आणि हळुवार प्रेमकहाणी पुन्हा लोकप्रिय होणे ही खास बाब आहे. जर तुम्ही हा चित्रपट अजून पाहिला नसेल, तर नेटफ्लिक्सवर ट्रेंड होत असलेला हा चित्रपट तुमच्या वॉचलिस्टमध्ये नक्कीच असायला हवा.
