विरार : राज्यात सध्या अपघाताचे प्रमाण दिवसेंदिवस वाढत चालले आहे. अशीच एक अपघाताची घटना विरारमध्ये घडली आहे. यामध्ये दारुच्या नशेत कार चालवून एका चालकाने प्राध्यापिकेला उडवलं आहे. या घटनेत त्या गंभीर जखमी झाल्या. त्यांना तातडीने रुग्णालयात दाखल करण्यात आले मात्र त्यांचा उपचारादरम्यान दुर्दैवी मृत्यू झाला. आत्मजा कासट (वय, ४५) असे मृत प्राध्यापिकेचे नाव आहे.

कसा घडला अपघात?
आत्मजा कासट या गुरुवारी सायंकाळी साडेसहाच्या सुमारास मुंबईच्या उत्तरेकडील विरार येथील आपल्या घराकडे पायी जात होत्या. त्यावेळी मद्यधुंद कार चालकाने त्यांना उडवले. या धडकेत आत्मजा या गंभीर जखमी झाल्या. त्यानंतर त्वरीत जवळच्या रुग्णालयात दाखल करण्यात आले. मात्र, आज (शुक्रवारी ०२ ऑगस्ट २०२४) पहाटे उपचारादरम्यान त्यांचा मृत्यू झाला आहे. याप्रकरणी पोलिसांनी कार चालकाला अटक केली आहे. शुभम पाटील असे अटक करण्यात आलेल्या कार चालकाचे नाव आहे.

निष्काळजीपणा आणि मद्यप्राशन करून वाहन चालविल्यामुळे मृत्यू झाल्याप्रकरणी शुभम प्रताप पाटील याला अटक करण्यात आली असल्याचे अर्नाळा पोलीस ठाण्याचे वरिष्ठ पोलिस निरीक्षक विजय पाटील यांनी सांगितले. या घटनेमुळे परिसरात एकच खळबळ उडाली.