Dr. Manisha Jejurkar : शहरातील प्रख्यात आयुर्वेदिक तज्ज्ञ डॉ. मनीषा जेजुरकर (Dr. Manisha Jejurkar) यांनी आत्महत्या करून आपले आयुष्य संपवले आहे. या घटनेमुळे नाशिकच्या वैद्यकीय क्षेत्रात हळहळ व्यक्त केली जात आहे. विशेष म्हणजे डॉ. मनीषा जेजुरकरांचे (Dr. Manisha Jejurkar) पती डॉ. नीलेश जेजुरकर हे जिल्हा शासकीय रुग्णालयातील वरिष्ठ मनोविकारतज्ज्ञ आहेत. माहितीनुसार, डॉ. मनीषा जेजुरकर या गंगापूर रोड परिसरात कुटुंबासह राहत होत्या. त्यांनी राहत्या घरात शुक्रवारी आत्महत्या केली. डॉ. मनीषा जेजुरकर यांची कुशल आणि अनुभवी आयुर्वेदिक तज्ज्ञ म्हणून ओळख होती. त्यांच्या उपचारांमुळे अनेक रुग्णांना दिलासा मिळाला होता. त्यामुळे रुग्णांमध्ये त्या लोकप्रिय होत्या. या घटनेतील सर्वात वेदनादायी बाब म्हणजे त्यांचे पती डॉ. नीलेश जेजुरकर हे नाशिक जिल्हा शासकीय रुग्णालयात वरिष्ठ मनोविकारतज्ज्ञ आहेत. मानसिक तणाव, नैराश्य आणि इतर मानसिक आजारांनी ग्रस्त असलेल्या रुग्णांना ते मार्गदर्शन करून उपचार देतात. समाजात मानसिक आरोग्याबाबत जागृती करण्याचेही त्यांचे कार्य आहे. मात्र मानसिक आरोग्य क्षेत्रातील तज्ज्ञ असलेल्या डॉक्टरांच्या घरातच अशी दुर्दैवी घटना घडल्याने अनेकांना नियतीचा हा विचित्र खेळ वाटत आहे. दरम्यान, या आत्महत्येमागील कारण अद्याप स्पष्ट झालेले नाही. नेमक्या कोणत्या मानसिक तणावामुळे किंवा वैयक्तिक कारणांमुळे त्यांनी हे टोकाचे पाऊल उचलले याचा तपास गंगापूर रोड पोलीस करत आहेत.
