अकोला : केंद्रीय गृहमंत्री अमित शहा यांच्या आंबेडकरांबाबतच्या वक्तव्यावरून वंचित बहुजन आघाडीचे अध्यक्ष प्रकाश आंबेडकरांनी भाजपला घेरले आहे. त्यांनी संघ, भाजप अन् अमित शहा यांच्यावर घणाघाती टीका केली.भाजप आणि संघाचे जे काही जुने प्लॅन आहेत ते आता अंमलात आणण्यासाठी बाबासाहेब आंबेडकर अडसर आहेत, असा दावाही त्यांना केला.

भाजपचे जुने प्लॅन अंमलात आणण्यासाठी त्यांना काँग्रेस पक्ष अडसर नसून बाबासाहेब आहेत. त्यामुळेच त्यांचा जळफळाट होत आहे. तोच जळफळाट त्यांच्या वक्तव्यातून बाहेर आला. भाजप आता जन्माला आला आहे. त्यांच्या आधी जनसंघ होता. त्याच्या आधी राष्ट्रीय स्वयंसेवक संघ होते. घटनेच्या कालखंडामध्ये सर्वांत मोठा विरोध बाबासाहेबांना कोणी केला असेल, तर तो या संघटनेने केला, असा दावाही आंबेडकरांनी केला. लोकसभेत अमित शहा यांनी जे वक्तव्य केले, त्यातून त्यांची जुनी मानसिकता बाहेर पडली, असेही ते म्हणाले.

बांगलादेशच्या नाड्या आवळणे गरजेचे
प्रकाश आंबेडकर यांनी बांगलादेशात होत असलेल्या हिंदुंवरील अत्याचाराबाबातही भाष्य केले. बांगलादेशच्या नाड्या आवळणे गरजेचे आहे. केंद्रात तुमची सत्ता आहे. त्यामुळे आपण त्यांना वीज देत आहोत, ती बंद करा असे आवाहन प्रकाश आंबेडकरांनी केंद्र सरकारला केले. एकदा नियंत्रण सुटल की खालपर्यंत नियंत्रण सुटते, असेही ते म्हणाले.