सातारा : वर्षाअखेरीस ३१ डिसेंबरला सेलिब्रेशनच्या नावाखाली तरुण पिढीमध्ये मोठ्या प्रमाणात व्यसनाधिनता वाढताना दिसत आहे. अनेक तरुण- तरुणी ३१ डिसेंबरला व्यसनाचा पहिला अनुभव घेतात आणि पुढे जाऊन व्यसनाच्या आहारी जातात. या पार्श्वभूमीवर २८ डिसेंबर ते ३ जानेवारी कालावधीमध्ये महाराष्ट्र अंधश्रद्धा निर्मूलन समिती आणि परिवर्तन व्यसनमुक्ती संस्था यांच्यामार्फत ‘चला व्यसन बदनाम करूया’ या मोहिमेंतर्गत ‘दारू नको, दूध प्या!’ हा उपक्रम सातारा जिल्ह्यात राबवला जाणार आहे, अशी माहिती डॉ. हमीद दाभोलकर आणि प्रशांत पोतदार यांनी प्रसिद्धीपत्रकाद्वारे दिली. या दोन्ही संस्था गेल्या १५ वर्षांपासून ३१ डिसेंबरच्या आठवड्यात ‘चला, व्यसन बदनाम करूया,’ ही मोहीम राबवते. सध्या समाजात व्यसनाचे उद्दात्तीकरण होताना दिसते. यामुळे तरुण मुले व्यसनाच्या आहारी जाण्याचे प्रमाण वाढत आहे. असे असताना महाराष्ट्र शासन मात्र महसूल वाढवण्यासाठी समाजात व्यसन वाढवण्याला प्रोत्साहन देत आहे. मद्यविक्री वाढवून महसूल वाढवण्याचे शासनाने नुकतेच सुतोवाच केले आहे. याला आमचा विरोध आहे. व्यसनाची प्रतिष्ठा तोडण्याबरोबरच शासनाने समग्र व्यसन विरोधी नीती जाहीर करावी यासाठी देखील या सप्ताहदरम्यान पाठपुरावा केला जाणार आहे, असे त्यांनी सांगितले. या सप्ताहांतर्गत राज्यभरात व्यसन विरोधी युवा निर्धार मेळाव्यांचे आयोजन करण्यात आले आहे. व्यसनमुक्त व्यक्तीच्या हस्ते दारूच्या बाटलीला जोडे मारून मेळाव्याचे उदघाटन केले जाणार आहे. या मेळाव्यामध्ये तरुणांना व्यसनमुक्ती दूत म्हणून काम करण्याचे प्रशिक्षण देण्यात येणार आहे. व्यसनमुक्ती दूताचे प्रशिक्षण घेतलेले युवक युवती पुढील आठवड्यामध्ये समाजात व्यसनाच्या विरोधी पोस्टर प्रदर्शन, व्यसन विरोधी फिल्म शाळा कॉलेजमध्ये दाखवणे, गावामध्ये व्यसन विरोधी फेरीचे आयोजन करणे, शाळा कॉलेजमध्ये व्यसनाविषयी भाषण देणे, दारूच्या बाटलीला जोडे मारा आंदोलन, व्यसनविरोधी प्रतिज्ञा असलेल्या फ्लेक्सवर नागरिकांच्या सह्या घेणे तसेच सोशल मिडियावर व्यसन विरोधी संदेश प्रसारित करणे असे कार्यक्रम ठिकठिकाणी करणार आहेत. ३१ डिसेंबरला लोकांनी दारू प्यावी म्हणून दारू दुकाने उशिरापर्यंत सुरु ठेवण्याची परवानगी शासन देते हे व्यसनाला प्रोत्साहन देणारे धोरण शासनाने थांबवावे म्हणून जिल्हाधिकारी आणि तहसीलदारांना ठिकठिकाणी निवेदन देण्यात येणार असल्याचे पत्रकात नमूद केलेले आहे. ‘दारू नको दुध प्या’ या अभिनव कार्यक्रमाचे आयोजन ३१ डिसेंबरला करण्यात आले आहे. या कार्यक्रमामध्ये नागरिकांना दारूचे दुष्परिणाम सांगून दारूऐवजी शरीराला हितकारक दूध पिण्याचे आवाहन करण्यात येणार आहे. नागरिकांना दुधाचे मोफत वाटपकरण्यात येणार आहे. तसेच ३१ डिसेंबर रोजी महाराष्ट्रात ठिकठिकाणी व्यसनमुक्त व्यक्ती आणि त्यांचे कुटुंबीयांचे स्नेहमेळावे आयोजित होणार आहेत. नागरिकांनी या मोहिमेमध्ये सहभागी होऊन व्यसनविरोधी कार्यक्रमात पुढाकार घ्यावा, असे आवाहन किशोर काळोखे, उदय चव्हाण, वंदना माने, दीपक माने, भगवान रणदिवे यांनी केले आहे. पुसेगाव आणि सातारा येथे दि. ३१ रोजी दूध वाटप. परिवर्तन व्यसनमुक्ती संस्थेत व्यसनमुक्त आणि कुटुंबीय मेळावा. प्रमुख शाळा कॉलेजमध्ये व्यसन विरोधी युवा जागर.
