Dongri Mahotsav 2026 – जिल्ह्यातील पाटण तालुक्यातील सह्याद्रीच्या निसर्गरम्य परिसरात साजरा होत असलेला ‘कोयना दौलत डोंगरी महोत्सव 2026′ हा संस्कृती, पर्यटन आणि उद्योजकतेचा संगम ठरत आहे. पारंपरिक कला, साहसी पर्यटन आणि अनुभवाधारित पर्यटन यांचा संगम साधत पर्यटन क्षमतेत भर घालण्याचा या महोत्सवाचा उद्देश आहे. या महोत्सवाला राज्यभरातून मोठ्या संख्येने पर्यटकांनी उपस्थिती दर्शवली असून त्याला उत्स्फूर्त प्रतिसाद मिळत आहे. यामुळे महोत्सवाची वाढती लोकप्रियता अधोरेखित होत आहे. दि. 4 रोजी लालबाग, मुंबईचा स्वरांजली ब्रास बँड, पुण्यातील प्रभात ब्रास बँड, बारामतीमधील अमर ब्रास बँड आणि जालन्यातील सरस्वती ब्रास बँडच्या सादरीकरणामुळे संगीताची मेजवानी लाभली. सांस्कृतिक कार्यक्रमांबरोबरच बोटिंग, पॅराग्लायडिंग, फूड फेस्टिव्हल, विविध प्रदर्शन आणि सफारी यांसारख्या उपक्रमांमुळे पर्यटकांना दिवसभर विविध अनुभव घेता आले. दि. 5 रोजी होणारा लावणी महोत्सव हा आणखी एक विशेष आकर्षण ठरणार असून सायली केळकर, राधिका पाटील, शिवानी मुंबैकर, स्नेहा लखनगावकर, आशा रूपा परभणीकर आणि प्रिया काळे-नगरकर यांच्या सादरीकरणामुळे महाराष्ट्राच्या पारंपरिक लावणी कलेचा बहारदार आविष्कार पाहायला मिळणार आहे. महोत्सवाचा समारोप दि. 6 रोजी होणार असून या समारंभाला उपमुख्यमंत्री एकनाथ शिंदे उपस्थित राहणार आहेत. त्यांच्या हस्ते कोयना नदीवरील नवीन सांगवड पूल, स्वर्गीय शिवाजीराव देसाई स्मृती भवन (दौलतनगर) आणि शिवाजीराव दौलत स्टेडियम यांसारख्या महत्त्वपूर्ण विकासकामांचे उद्घाटन होणार आहे. समारोपाच्या दिवशी मनोरंजन क्षेत्रातील अनेक नामवंत कलाकारांची उपस्थिती लाभणार असून ईशा मालवीय, प्रविण तरडे, स्पृहा जोशी, प्रियदर्शन जाधव, संस्कृती बालगुडे, गिरिजा प्रभू, जान्हवी किल्लेकर, योगिता चव्हाण, भाऊ कदम, हेमांगी कवी, अरुण कदम, रसिका वेंगुर्लेकर, रोहित राऊत, जुईली जोगळेकर, कविता राम, तेजपाल वाघ, अभिजीत जाधव, अमू जाधव, पूनम कुडाळकर, अर्चना जावळेकर, नमिता पाटील आणि अस्मिता पुनेकऱ आदींचा सहभाग असणार आहे.
