Donald Trump on India। अमेरिकेचे राष्ट्राध्यक्ष डोनाल्ड ट्रम्प गेल्या काही काळापासून भारतावर सतत निशाणा साधत आहेत. डोनाल्ड ट्रम्प यांनी,” त्यांनी रशियाचे तेल खरेदी केल्याबद्दल भारतावर सुरुवातीचे निर्बंध लादले आहेत आणि आणखी निर्बंध लादले जाऊ शकतात” असे संकेत दिले. त्यांनी दावा केला की, या निर्णयामुळे मॉस्कोला आधीच शेकडो अब्ज डॉलर्सचे नुकसान झाले आहे आणि इशारा दिला की दुसरा आणि तिसऱ्या टप्प्याचे निर्बंध अजूनही लागू केले नाहीत.

पोलंडचे अध्यक्ष कॅरोल नौरोकी यांच्याशी झालेल्या द्विपक्षीय बैठकीदरम्यान ट्रम्प यांनी हे विधान केले आहे.यावेळी पोलंडच्या एका  पत्रकाराने त्यांना रशियाचे अध्यक्ष व्लादिमीर पुतिन यांच्याबद्दल नाराजी व्यक्त करूनही कोणतीही कारवाई न करण्याबद्दल प्रश्न विचारला तेव्हा ट्रम्प चांगलेच भडकल्याचे दिसत होते. पत्रकाराने विचारले की, त्यांनी पुतिन यांच्याकडे निराशा आणि हतबलता व्यक्त केली होती परंतु या संदर्भात कोणतीही कारवाई करण्यात आली नाही. यावर ट्रम्प संतापले.

‘रशियाने शेकडो अब्ज डॉलर्स गमावले’

ट्रम्प यांनी या प्रश्नावर उत्तर देताना, ‘तुम्हाला कसे कळले की कोणतीही कारवाई झाली नाही? तुम्ही म्हणाल की चीनबाहेर सर्वात मोठा खरेदीदार असलेल्या भारतावर दुय्यम निर्बंध लादणे जवळजवळ समतुल्य आहे? तुम्ही म्हणाल की कोणतीही कारवाई झाली नाही? यामुळे रशियाला शेकडो अब्ज डॉलर्सचे नुकसान झाले. तुम्ही याला कोणतीही कारवाई नाही म्हणाल का? आणि मी अजून दुसरा किंवा तिसरा टप्पा पूर्ण केलेला नाही. पण जेव्हा तुम्ही म्हणता की कोणतीही कारवाई झाली नाही, तेव्हा मला वाटते की तुम्ही नवीन काम शोधले पाहिजे.’असे म्हणत आपला राग व्यक्त केला.

ट्रम्प पुढे म्हणाले की, ” ‘दोन आठवड्यांपूर्वी मी म्हटले होते की जर भारताने तेल खरेदी केले तर त्याला मोठ्या समस्या येतील आणि तेच घडले. म्हणून मला त्याबद्दल सांगू नका.’असे म्हणत त्यांनी भारतावर आणखी निर्बंध लागू करण्यात येणार असल्याचे यावेळी सांगितले.

‘भारतावरील निर्बंध म्हणजे मॉस्कोविरुद्धची कारवाई आहे’ Donald Trump on India। 

पुतिन, उत्तर कोरियाचे नेते किम जोंग उन आणि चीनचे अध्यक्ष शी जिनपिंग यांनी बीजिंगमधील लष्करी परेडमध्ये एकत्र येऊन मॉस्कोवर दुय्यम निर्बंध लादण्याशी संबंधित प्रश्नाला उत्तर देताना ट्रम्प म्हणाले की त्यांच्या सरकारने भारतावर निर्बंध लादून मॉस्कोविरुद्ध आधीच कारवाई केली आहे. ते म्हणाले, ‘मी भारताच्या संदर्भात हे आधीच केले आहे आणि आम्ही इतर गोष्टींच्या बाबतीतही हे करत आहोत.’

‘मग भारताला अधिक दंडांना सामोरे जावे लागू शकते…’

त्यांनी चीननंतर भारताला रशियन तेलाचा सर्वात मोठा खरेदीदार म्हणून वर्णन केले आणि संकेत दिला की जर भारताने मॉस्कोकडून ऊर्जा आयात करणे सुरू ठेवले तर भारताला अधिक दंडांना सामोरे जावे लागू शकते. अमेरिकेने चीनवरील अतिरिक्त कर नोव्हेंबरपर्यंत तात्पुरते स्थगित केले आहेत, तर भारतावर मोठ्या प्रमाणात कर लादले आहेत. ट्रम्प यांनी भारतावर २५ टक्के कर आणि भारताकडून रशियन तेल खरेदीवर २५ टक्के अतिरिक्त कर लादला आहे. २७ ऑगस्टपासून लागू झालेल्या या नवीन उपाययोजनांमुळे भारतीय वस्तूंवरील शुल्क प्रभावीपणे दुप्पट झाले आहे, ज्यामुळे एकूण कर ५० टक्क्यांवर पोहोचला आहे.

ट्रम्पच्या करांबद्दल भारताची भूमिका Donald Trump on India। 

त्याच वेळी, पंतप्रधान नरेंद्र मोदी म्हणाले आहेत की ते शेतकरी, पशुपालक, लघु उद्योगांच्या हितांशी तडजोड करू शकत नाहीत. त्यांनी इशारा दिला की आपल्यावर दबाव वाढू शकतो, परंतु आम्ही ते सहन करू. भारताने अमेरिकेने लादलेले कर अन्याय्य असल्याचे म्हटले आहे. भारताचे म्हणणे आहे की कोणत्याही मोठ्या अर्थव्यवस्थेप्रमाणे, ते आपल्या राष्ट्रीय हितांचे आणि आर्थिक सुरक्षेचे रक्षण करण्यासाठी आवश्यक ती सर्व पावले उचलेल.