भोर : भोर तालुक्यातील पेंजळवाडी येथील एका महिलेची 24 सप्टेंबर मंगळवारी पहाटे ६ वाजून १४ मिनिटांनी भर रस्त्यात रुग्णवाहिकेतच प्रसुती करण्यात आली. काजल रंगराव चव्हाण (वय २२ वर्ष) असे या महिलेचे नाव आहे. या महिलेने एका बालिकेला जन्म दिला असून, नवजात बालिका आणि आई दोन्हीही सुस्थितीत आहेत. ही प्रसूती करणारे वैद्यकीय अधिकारी डॉ. मिलींद कांबळे आणि आशा वर्कर मीना चव्हाण यांचे महिलेच्या नातेवाईंकांनी आभार मानलेत..

याबाबत अधिक माहिती अशी की, मंगळवारी पहाटे ५ वाजून ३८ मिनिटांनी १०८ क्रमांकावर भोर तालुक्यातील पेंजळवाडी येथील महिलेस प्रसुतीस घेऊन जाण्यासाठी कॉल आला. त्यावेळी १०८ क्रमांकाची रुग्णवाहिका ही भोर शहरातील उपजिल्हा रुग्णालयात होती. यानंतर तातडीने रुग्णवाहिकेचे चालक सचिन राऊत यांच्यासह डॉ. मिलींद कांबळे हे भोर ते पेंजळवाडी हे २२ किलोमीटरचे अंतर केवळ २० मिनिटांमध्येच पार करून गावात पोहोचले.

त्यांनतर त्यांनी गरोदर महिला काजल चव्हाण यांना रुग्णवाहिकेमध्ये घेऊन रुग्णवाहिका भोंगवली (ता. भोर) येथील प्राथमिक आरोग्य केंद्राकडे निघाले असताना त्यावेळेस पाऊस पडत होता. तसेच रस्त्यावर पाणी, चिखल आणि खड्डे असल्यामुळे रुग्णवाहिका हळुवारपणे चालवावी लागत होती. त्यामुळे भोंगवलीच्या प्राथमिक आरोग्य केंद्रावर पोहोचण्यासाठी वेळ लागणार होता.

मात्र महिलेला खूप तीव्र प्रसुतीवेदना होत असल्यामुळे डॉ. मिलींद कांबळे यांनी रुग्णवाहिका भोंगवली फाट्यापासून शंभर मीटर अंतरावर रस्त्याच्या कडेला थांबवली. आणि ६ वाजून १४ मिनीटांनी रुग्णवाहिकेतच डॉक्टरांनी तिची सुखरुप प्रसुती केली. या महिलेने एका बालिकेला जन्म दिला असून नवजात बालिका आणि आई दोन्हीही सुखरूप आहेत. प्रसुती सुरळीत झाल्यानंतर डॉक्टरांनी महिला आणि तीच्या बाळाला भोंगवलीच्या प्राथमिक आरोग्य केंद्रात दाखल केले असून बालिकेचे वजन २.९ किलोग्रॅम आहे. त्यानंतर महिलेच्या नातेवाईकांनी आणि नागरिकांनी डॉक्टर मिलींद कांबळे, आशा वर्कर मीना चव्हाण आणि चालक सचिन राऊत यांचे अभिनंदन केले.