पिंपरी –  मुख्य अभियंता प्रमोद ओंभासे यांच्यावरील लाचप्रकरणावरून पिंपरी-चिंचवड महापालिकेच्या सर्वसाधारण सभेत नगरसेवकांनी प्रशासनाला धारेवर धरले. अधिकारी उत्तरे देत नाहीत, नागरिकांची कामे रखडतात आणि भ्रष्टाचाराच्या प्रकरणांत ठोस कारवाई होत नाही, अशा आरोपांची सरबत्ती करण्यात आली.

आयुक्त भेटत नाही, आमची काही इज्जत आहे का नाही? असा संतप्त सवाल नगरसेवकांनी केला. त्यातच आयुक्त सभेत येऊन निघून गेल्याने नगरसेवकांनी उभे राहून निषेध नोंदविला. गोंधळानंतर १५ ऑक्टोबरची तहकूब सभा पुन्हा २० नोव्हेंबरपर्यंत तहकूब करण्यात आली.

ऑक्टोबर महिन्याची तहकूब सभा शुक्रवारी (दि. ३०) झाली. सभेच्या अध्यक्षस्थानी उपमहापौर शर्मिला बाबर होत्या. सभेच्या सुरूवातीला नगरसेवक संदीप वाघेरे यांच्या वडिलांच्या निधनाबद्दल श्रद्धांजली वाहून कामकाज २० मिनिटांसाठी तहकूब करण्यात आले.

त्यानंतर चिंचवड येथील आगीत ७० जणांचा जीव वाचविल्याबद्दल आर्या कांबळे हिचा महापालिकेतर्फे सत्कार करण्यात आला. राष्ट्रीय विज्ञान प्रदर्शनात सहभागी होऊन ‘सुपर १६’मध्ये स्थान मिळविलेल्या गीता धनवडे हिचाही गौरव करण्यात आला.

मुख्य अभियंता प्रमोद ओंभासे यांच्यावर लाचलुचपत प्रतिबंधक विभागाने कारवाई केली. त्यामुळे पिंपरी चिंचवड महापालिकेची बदनामी झाल्याचे सांगत शिवसेनेचे गटनेते विश्‍वजीत बारणे यांनी प्रशासनाला जाब विचारला.

आतापर्यंत लाचप्रकरणांत ३९ जण सापडले; मात्र केवळ चौघांवर कारवाई झाल्याचा दावा त्यांनी केला. ओंभासे यांच्यावर उपअभियंता असताना निलंबनाची कारवाई झाली होती, तरीही त्यांच्याकडे मुख्य अभियंतापदाचा कार्यभार कसा दिला, असा प्रश्न त्यांनी उपस्थित केला.

अधिकारी नगरसेवकांना किंमत देत नाहीत आणि विभागांकडून पत्रांना उत्तरेही मिळत नाहीत, अशी टीका विरोधी पक्षनेते भाऊसाहेब भोईर यांनी केली.

क्षेत्रीय अधिकारी अतुल पाटील हे थेट बदली करण्यास सांगतात, असे नमूद करत त्यांनी अशा प्रकारांवर नियंत्रणासाठी समिती स्थापन करण्याची मागणी केली. तर ‘कटिबद्ध जनहिताय’ऐवजी ‘कटिबद्ध स्वहिताय’ असा कारभार सुरू असल्याची टीका नगरसेवक जितेंद्र ननावरे यांनी केली.

वायसीएम रुग्णालयातील कथित मद्यपानाचा व्हिडिओ, ठेकेदारांना मिळणारे पाठबळ आणि श्वान नसबंदीचा अहवाल गायब झाल्याच्या आरोपांवरून त्यांनी प्रशासनाला प्रश्न विचारले. तर आयुक्त नगरसेवकांना भेटत नाही. आम्ही सगळे राजीनामा देऊ का असा उद्गिग्न सवाल उपस्थित केला. अधिकाऱ्यांना लाखो रुपये पगार मिळत असतानाही कामे होत नसल्याने नागरिकांचा रोष वाढत आहे.

न्याय मागायचा कोणाकडे, असा सवाल नगरसेवक अनंत कोऱ्हाळे यांनी केला. दरम्यान, आयुक्त सभेत येऊन पुन्हा निघून गेल्याने नगरसेवकांनी तीव्र नाराजी व्यक्त केली. सदस्यांनी उभे राहून निषेध केला. इतक्या गंभीर मुद्द्यांवर चर्चा सुरू असताना देखील आयुक्त डॉ. विजय सूर्यवंशी यांना गांभीर्य नसल्याचा आरोप नगरसेवकांनी केला.

तर सर्वच नगरसेवकांनी आयुक्तांवर टीका करत सभा तहकूब करण्याची मागणी केली. त्यानंतर सभा २० नोव्हेंबरपर्यंत तहकूब करण्यात आली.

अधिकाऱ्यांच्या डोळ्यांवर नोटा
सुधारित मंजुरीच्या नावाखाली लूट सुरू असल्याचा आरोप नगरसेवक शीतल शिंदे यांनी केला. शिंदे म्हणाले, मोठे प्रकल्प आणताना स्थानिक नागरिकांचा विचार करावा आणि अनधिकृत बांधकामांतील गैरप्रकारांवर कारवाई करावी. आठ महिन्यांपासून पत्रव्यवहार करत असून एकाही पत्राला प्रशासनाने उत्तर दिल नाही.

अधिकाऱ्यांना काही बोललं तर सगळे अधिकारी एकत्र येऊन आमच्या विरोधात काळ्या फिती बांधून येतात. पण यामुळे शहर बकाल होत असून अधिकारी मलिदा खाऊन जाणार आहेत. त्यांची चौकशी झाली पाहिजे अशी मागणी शिंदे यांनी केली.

Pimpri-Chinchwad: तिसरा-चौथा रेल्वे ट्रॅक कागदावरच; अनेकदा सर्वेक्षण