बाजारपेठांमध्ये उत्साहाचे वातावरण; वाहतुकीचा वेग मंदावला
Diwali Shopping: दिवाळी अगदी चार दिवसांवर म्हणजे शुक्रवारी (दि. ६) धनत्रयोदशीच्या दिवशी सुरू होणार असल्याने पुण्यात खरेदीची लगबग सुरू आहे. दिवाळीपूर्वीचा शेवटचा रविवार (दि. १) आणि सुट्टीचा दिवस असल्याने शहरातील प्रमुख बाजारपेठांमध्ये खरेदीसाठी पुणेकरांनी मोठी गर्दी केली होती.

लक्ष्मी रस्ता, तुळशीबाग, मंडई, बोहरी आळी, कॅम्प परिसर आदी ठिकाणी दिवसभर खरेदीसाठी नागरिकांची रेलचेल पाहायला मिळाली. गर्दीमुळे काही रस्त्यांवर वाहतुकीचा वेग मंदावला होता.

लक्ष्मी रस्त्यावर कपडे, साड्या, दागिने आणि विविध प्रकारच्या भेटवस्तूंसाठी ग्राहकांनी विशेष गर्दी होती. पूजेचे साहित्य, बांगड्या आणि सजावटीच्या वस्तूंसाठी तुळशीबागेतही महिलांची मोठी वर्दळ होती. मंडई परिसरात पूजेचे साहित्य, फुले, फळे आणि फराळासाठी लागणाऱ्या वस्तूंची, तर बोहरी आळीमध्ये विद्युत उपकरणे, दिव्यांची माळ आणि घरगुती सजावटीच्या वस्तू खरेदीसाठी ग्राहकांची झुंबड उडाली होती.

कॅम्प परिसरातील एम. जी. रस्ता आणि फॅशन स्ट्रीटवरही कपडे, पादत्राणे आणि विविध वस्तूंच्या खरेदीसाठी ग्राहकांची वर्दळ दिसली. त्यामुळे शहरातील बाजारपेठांमध्ये उत्साहाचे वातावरण निर्माण झाले होते. सणाच्या पार्श्वभूमीवर व्यापाऱ्यांनीही मोठी तयारी केली होती.

शहरात शनिवारप्रमाणे मोठी वाहतूक कोंडी कुठे जाणवली नसली, तरी लक्ष्मी रस्ता, कुमठेकर रस्ता, टिळक रस्ता, बाजीराव रस्ता आणि इतर अनेक महत्त्वाच्या रस्त्यांवर वाहतुकीचा वेग मंदावला होता. अनेकांनी त्यांची चारचाकी वाहने नदीपात्रात लावून खरेदीला जाणे पसंत केल्याने तिथे काही प्रमाणात वाहतूककोंडी जाणवली, तसेच अनेकांनी शनिवारच्या कोंडीतून धडा घेऊन मेट्रो, पीएमपीएमएलसारख्या सार्वजनिक वाहतूक सेवांचा वापर करणे पसंत केले.

सार्वजनिक वाहतूक वापरा Diwali Shopping: 
येत्या काही दिवसांत सरकारी आणि खासगी कार्यालयांसह सर्व शाळांना सुट्टी लागणार असल्याने गर्दीत वाढ होण्याची शक्यता आहे. त्यामुळे खरेदीसाठी येणाऱ्या नागरिकांनी गर्दी टाळण्यासाठी सार्वजनिक वाहतूक पर्यायांचा वापर करावा, असे आवाहन आरटीओ व महापालिका प्रशासनाने केले आहे.