Satara: अमोल मोहिते यांची मिळकत रस्ता रुंदीकरणात जात असताना त्यांनी जाणीवपूर्वक पदाचा गैरवापर करुन मिळकतीचे अतिक्रमण हटवून दिले नाही. तसेच स्वत:चे घर वाचवण्यासाठी अतिक्रमण मोहीम समर्थ मंदिर, बोगदा परिसरातच राबवण्यात आली. त्यामुळे पदाचा गैरवापर केल्याप्रकरणी त्यांना अपात्र करण्यात यावे, अशी मागणी सामाजिक, माहिती अधिकार कार्यकर्ते सुशांत मोरे यांनी जिल्हाधिकाऱ्यांकडे निवेदनाद्वारे केली आहे.

शहरात काही दिवसांपासून सुरु असलेली पालिकेची अतिक्रमण हटाव मोहीम चर्चेत आहे. अतिक्रमण हटवताना चेहरे बघून कारवाई होत असल्याचा आरोप होत आहे. समर्थ मंदिर, बोगदा परिसरातही काहींच्या संरक्षक भिंती तसेच बंगले तसेच ठेवले आहे. त्यातच नगराध्यक्ष अमोल मोहिते यांनीच स्वत:चे अतिक्रमण काढून देण्यास प्रतिबंध केल्याचे स्पष्ट झाले आहे.

अमोल मोहिते यांनी निवडणुकीतील उमेदवारी नामनिर्देशनपत्रामध्ये राहण्याचा पत्ता १६५, गुरुवार पेठ, सातारा असा लिहिला आहे. मुख्याधिकाऱ्यांनी ५ मे २०२६ रोजी प्रसिद्ध केलेल्या सार्वजनिक सूचनेमध्ये नगरपालिका इमारत ते बोगदा परिसरापर्यंतचा रस्ता शहराच्या पहिल्या सुधारित विकास योजनेनुसार अस्तित्वातील रस्त्यास १५ मीटरचे रूंदीकरण प्रस्तावित करण्यात आले आहे. शासनाकडे मंजुरीकरता सादर असलेल्या दुसऱ्या सुधारित विकास योजनेमध्ये देखील या रस्त्यास १५ मीटरचे रुंदीकरण दर्शविण्यात आले आहे.

नगराध्यक्ष अमोल मोहिते यांची मिळकत पेठ गुरूवार सि. स.नं १६५ रस्ता रुंदीकरणात अतिक्रमण आहे. त्यांनी त्यांच्या पदाचा गैरवापर करुन अतिक्रमण काढलेले नाही, सेमोरे यांनी निवेदनात म्हटले आहे. नगराध्यक्ष मोहिते यांनी २१ मे रोजी मुख्याधिकाऱ्यांसमवेत अतिक्रमण काढण्याची मोहिम हाती घेतली. परंतु, ही मोहीम माची पेठेपासून राबवली असती तर रस्ता रुंद झाला असता. मात्र, केवळ समर्थ मंदिर, बोगदा परिसरात कारवाई करण्यात आली. यात सर्वसामान्यांच्या घरावर बुलडोझर फिरवण्यात आला.

माची पेठेतील स्वत:चे घर वाचावे म्हणून मुख्याधिकारी आणि नियोजन सभापतींना हाताशी धरून ही मोहीम जाणूनबूजून समर्थ मंदिर, बोगदा परिसरात राबवण्यात आली. अमोल मोहिते यांना नगराध्यक्ष म्हणून अपात्र घोषित करण्यात यावे, अशी मागणी श्री. मोरे यांनी केली आहे.