Disha Patani : दिशा पाटनीचे हॉलीवूडमध्ये पदार्पण; म्हणाली ‘नशिबाचाही यात मोठा वाटा…’
Disha Patani : ‘हॉलीगार्ड्स सागा - द पोर्टल ऑफ फोर्स’ या चित्रपटातून हॉलीवूडमध्ये एन्ट्री
Disha Patani : अभिनेत्री दिशा पाटनीने बॉलीवूड चित्रपटानंतर आता हॉलीवूडमध्ये पदार्पण केले आहे. ती लवकरच ‘हॉलीगार्ड्स सागा – द पोर्टल ऑफ फोर्स’ या चित्रपटातून हॉलीवूडमध्ये पाहायला मिळणार आहे. या चित्रपटात दिशा एका अत्यंत महत्त्वाच्या भूमिकेत दिसणार आहे.
विशेष म्हणजे, या चित्रपटाचे दिग्दर्शन प्रसिद्ध अभिनेते, ऑस्कर विजेते केविन स्पेसी करत आहे. एका मुलाखतीत दिशा पटानीने केविन स्पेसी यांच्यासोबत काम करण्याचा आपला अनुभव शेअर केला.
ती म्हणाली, “ते खरोखरच अप्रतिम आहेत. स्वतः एक अभिनेता असल्यामुळे ते आपल्या कलाकारांना खूप चांगल्या प्रकारे समजून घेतात. तेते आपल्या कलाकारांना मोकळेपणाने काम करण्याची आणि नवीन प्रयोग करण्याची संधी देतात. ते आम्हाला नेहमी सांगायचे की, आपण प्रत्येक सीनला आपल्या वैयक्तिक अनुभवांशी जोडून पाहिले पाहिजे.”
याशिवाय दिशाने हॉलीवूडमध्ये प्रवेश करण्याच्या आपल्या प्रवासावरही भाष्य केले. ती म्हणाली, “हॉलीवूडमध्ये ऑडिशन्सवर खूप जास्त भर दिला जातो. तुम्हाला प्रत्येक भूमिकेसाठी ऑडिशन द्यावीच लागते. नशिबाचाही यात मोठा वाटा असतो, कधीकधी ते फक्त तुमचे जुने काम पाहतात आणि स्वतःहून तुम्हाला प्रोजेक्ट्स किंवा ऑडिशन ऑफर करतात.
तिथे काम मिळणे हे व्हिसा आणि इतर गोष्टींवरही अवलंबून असते. यामध्ये अनेक तांत्रिक गोष्टींचा समावेश असतो. तो एक वेगळा देश आहे, त्यामुळे तुम्हाला तिथे प्रत्यक्ष उपस्थित राहावे लागते. तुम्ही भारतात राहून तिथे चांगल्या भूमिका मिळवू शकत नाही. तुम्ही इथून ऑनलाईन ऑडिशन नक्कीच देऊ शकता, पण तिथे स्वतः जाऊन काही दिवस राहणे आणि त्यावर काम करणे चांगले आहे.”
दरम्यान, या चित्रपटात हॉलीवूडचे अनेक मोठे चेहरे एकत्र दिसणार आहेत, ज्यामध्ये स्वतः केविन स्पेसी यांच्यासह डॉल्फ लुंडग्रेन, टायरेस गिब्सन, ब्रायना हिल्डेब्रांड, दिशा पटानी आणि एरिक रॉबर्ट्स यांचा समावेश आहे. या वर्षाच्या सुरुवातीला फेब्रुवारी महिन्यात बर्लिनमध्ये या चित्रपटाचा एक प्रायव्हेट प्रीमियर आयोजित करण्यात आला होता, मात्र याची रिलीज डेट अद्याप जाहीर झालेली नाही.
दिशा पाटनीचं वर्कफ्रंट
नुकतीच दिशा पाटनी अक्षय कुमारची मुख्य भूमिका असलेल्या ‘वेलकम टू द जंगल’ या कॉमेडी चित्रपटात दिसली होती. याशिवाय ती ‘आवारापन २’ या हिंदी चित्रपटातही दिसणार आहे. या चित्रपटात ती इमरान हाश्मीसोबत स्क्रीन शेअर करणार आहे. ‘आवारापन २’ १४ ऑगस्ट २०२६ रोजी मोठ्या पडद्यावर प्रदर्शित होणार आहे.
हेही वाचा:
