नवी दिल्ली : अभिनेत्री दिशा पाटनीच्या उत्तर प्रदेशातील बरेली येथील घराबाहेर शूटआऊट करणारे दोन्ही शूटर एन्काऊंटरमध्ये मारले गेले आहे. उत्तरप्रदेश एसटीएफच्या एका अधिकाऱ्याने याबद्दलची माहिती दिली. उत्तर प्रदेश एसटीएफच्या एका अधिकाऱ्याने दिलेल्या माहितीनुसार, यूपी एसटीएफ, सीआय यूनिट दिल्ली आणि नोएडा यूनिट यांच्या संयुक्त पथकाची गाझियाबादमध्ये शूटरसोबत चकमक उडाली. या दोघांनी अभिनेत्री दिशा पाटनी हिच्या उत्तर प्रदेशातील बरेली येथील निवासस्थानाबाहेर गोळीबार करुन दहशत निर्माण करण्याचा प्रयत्न केला होता. हे दोघेही रोहित गोदारा आणि गोल्डी बरार गँगचे सक्रीय सदस्य होते. घटनास्थळाहून ग्लॉक आणि जिगाना पिस्तूल आणि काडतूस जप्त करण्यात आले आहेत. दरम्यान, दिशा पाटनीच्या घराबाहेर गुरुवारी मध्यरात्री गोळीबार करण्यात आला होता. मोटारसायकलवर आलेल्या दोन शूटर्सनी दिशाच्या घराबाहेर फायरिंग केले होते. या घटनेनंतर उत्तर प्रदेश एसटीएफ, उत्तर प्रदेश पोलीस यांच्याकडे तपास देण्यात आला होता. त्यांनी दोनच दिवसांमध्ये संशयित शूटरची माहिती गोळा केली होती. गोळीबाराच्या दोन दिवस आधी देखील शूटआऊटचा प्रयत्न झाल्याचे निष्पन्न झाले होते. मात्र तो प्रयत्न फसला होता, असे एसटीएफच्या एका वरिष्ठ अधिकाऱ्याने सांगितले.
