पुणेः नुकताच माजी आमदार रविंद्र धंगेकर यांच्या समर्थकांनी जनतेच्या मनातील आमदार असलेला फ्लेक्स कसबा विधानसभा मतदार संघात लावण्यात आला होता. या फ्लेक्सवरून कसबा विधानसभेत मोठे राजकीय घमासान झाल्याचे पाहायला मिळाले. या फेक्समधून आमदार हेमंत रासनेंना डिवचण्याचा प्रयत्न करण्यात आल्याची चर्चा होती. यानंतर काही वेळातच हा फ्लेक्स काढून टाकण्यात आला. यानंतर आता परत एकदा धंगेकर यांनी अप्रत्यक्षपणे आमदार हेमंत रासने यांना लक्ष्य करत आव्हान दिले आहे. आता कसब्यात दुसऱ्या एका फ्लेक्सची चांगचील चर्चा रंगल्याचे पाहायला मिळत आहे. “माझ्या कसबा विधानसभेतील नागरिकांना नियमित व उच्च दाबाने पाणीपुरवठा करणार, असं आश्वासन देऊन विधानसभा निवडणुकीत त्यांनी मते घेतली. आता प्रत्यक्षात मात्र, घरोघरी पाण्याचे मीटर बसवून त्यांच्याकडून अन्यायकारक पाणीपट्टी वसूल करण्यात येत आहे. कसब्यातील सुज्ञ जनता त्यासोबत झालेली ही फसवणूक कधीही विसरणार नाही.” असा फ्लेक्स लावण्यात आल्याने महायुतीमध्येच जुने वाद मिटण्याऐवजी संघर्ष अधिक तीव्र होताना दिसत आहे. कसबा विधानसभेच्या पोटनिवडणुकीत रविंद्र धंगेकरांनी युतीचे उमेदवार असलेल्या हेंमत रासने यांचा पराभव केला होता. धंगेकर यांच्या विजयाची चर्चा राज्यभर झाली होती. त्यानंतर धंगेकर यांनी विविध आंदोलनांत आपला सक्रिय सहभाग नोंदवत आपल्या नावाची क्रेझ निर्माण केली. मात्र, विधानसभा निवडणुकीत त्यांचा पराभव झाला आणि मागच्या निवडणुकीत पराभूत झालेल्या हेमंत रासनेंनी कसब्यात दणक्यात विजय आपल्या नावे केला. विधानसभेनंतर लोकसभा निवडणुकीत रविंद्र धंगेकर यांना उमेदवारी देण्यात आले. मात्र, त्यांचा निवडणुकीत पराभव झाला. मतभेद वाद मिटणार का? १० मार्चला रविंद्र धंगेकरांनी काँग्रेसला रामराम ठोकत शिवसेनेत प्रवेश केला आणि आपल्या हाती धनुष्यबाण घेतला. त्यांच्या शिवसेनेतील पक्ष प्रवेशावर भाजपच्या पदाधिकारी व कार्यकर्त्यांनी नाराजीची देखील व्यक्त केली होती. धंगेकर हे महायुतीचा घटक पक्ष असलेल्या पक्षात आल्याने महायुतीच्या घटक पक्षातील नेत्यांशी असलेले मतभेद व वाद मिटतील का असा प्रश्न निर्माण झाला आहे.
