Avinash Sable : भारताचा राष्ट्रीय विक्रम धारक धावपटू अविनाश साबळे डायमंड लीग फायनलमध्ये 3 हजार मीटर स्टिपलचेस शर्यतीत सहभागी होणार आहे. ही स्पर्धा ब्रुसेल्समध्ये होणार आहे. याआधी डायमंड लीगच्या फायनलमध्ये भालाफेकपटू नीरज चोप्राने आपले स्थान निश्चित केले आहे. नीरज चोप्रा याच्यासह या स्पर्धेत स्थान मिळवणारा अविनाश साबळे हा दुसरा भारतीय ठरला आहे.अंतिम फेरीतील (फायनल) सर्व स्पर्धा 13 आणि 14 सप्टेंबरला होणार आहेत.

अविनाश साबळेने या मोसमात डायमंड लीगच्या दोन स्पर्धांमध्ये भाग घेतला आहे आणि डायमंड लीगच्या गुणतक्त्यात तीन गुणांसह तो 14व्या क्रमांकावर राहिला होता. मात्र, त्याच्यापेक्षा क्रमवारीत चार अॅथलिट पुढे होते. हे चारही अॅथलिट या स्पर्धेत सहभागी होणार नाहीत. त्यामुळे अविनाश साबळेला संधी मिळाली आहे.  29 वर्षीय साबळेने प्रथमच 12 खेळाडूंच्या डायमंड लीगच्या अंतिम फेरीत प्रवेश केला आहे. त्यांची स्पर्धा 13 सप्टेंबर रोजी होणार असून सर्व 12 स्पर्धक थेट अंतिम शर्यतीत सहभागी होतील. भालाफेकीची स्पर्धा 14 सप्टेंबरला होणार आहे.

या मोसमातील 14 पैकी पाच डायमंड लीग स्पर्धांमध्ये पुरुषांची 3000 मीटर स्टीपलचेस स्पर्धा होती. साबळेने 7 जुलै रोजी डायमंड लीगच्या पॅरिस टप्प्यात 8:09.91 मिनिटांचा वेळ नोंदवून स्वत:चा राष्ट्रीय विक्रम सुधारत सहावे स्थान पटकावले होते. यानंतर 25 ऑगस्ट रोजी सिलेसिया टप्प्यामध्ये तो 14व्या (8:29.96 मिनिटे) स्थानावर राहिला होता. त्यानंतर पुरुषांच्या 3000 मीटर स्टीपलचेसमध्ये ऑलिम्पिकच्या अंतिम फेरीत प्रवेश करणारा साबळे हा पहिला भारतीय ठरला होता परंतु तो त्याच्या कामगिरीने प्रभावित करू शकला नाही. पॅरिस ऑलिम्पिकमध्ये, त्याने 8:14.18 मिनिटांच्या वेळेसह निराशाजनक 11 वे स्थान मिळविले होते.

Diamond League Finals 2024 : नीरज चोप्रा अंतिम फेरीसाठी पात्र, अर्शद नदीम बाहेर.! जाणून घ्या, कधी आणि कुठे होणार लढत…

प्रत्येक डायमंड लीग सीझन फायनलच्या चॅम्पियनला प्रतिष्ठित ‘डायमंड ट्रॉफी’, $30,000 ची बक्षीस रक्कम आणि जागतिक ॲथलेटिक्स चॅम्पियनशिपसाठी वाइल्ड कार्ड दिले जाते. उपविजेत्याला $12,000 आणि आठव्या स्थानावर असलेल्या फिनिशरला $1,000 मिळतील.