Manisha Koirala : २०१२ मध्ये अभिनेत्री मनीषा कोईरालाला ओव्हेरियन कॅन्सरचे (गर्भाशयाच्या कर्करोगाचे) निदान झाले आणि त्यानंतर तिच्या आयुष्यात मोठे वादळ उठले होते. या कठीण काळातून ती जिद्दीने बाहेर पडली. आता एका मुलाखतीदरम्यान तिने कॅन्सरचे निदान झाल्यानंतरचा तो भयावह काळ आणि त्यावेळी आलेल्या भावनांबद्दल मनमोकळेपणाने भाष्य केले.

नेपाळमधील नॉर्विक इंटरनॅशनल हॉस्पिटलमध्ये असताना तिला कॅन्सरचे निदान झाल्याचे समजले. निदानाची माहिती तिला दिवसा मिळाली; मात्र त्या आजाराची खरी भीषणता तिला रात्री जाणवली. त्या रात्रीची आठवण सांगताना मनीषा म्हणाली की, “मला कॅन्सर झाल्याचे सांगण्यात आले. ती रात्र माझ्या आयुष्यातील सर्वात एकाकी आणि प्रदीर्घ रात्र होती.”

कॅन्सरचे निदान झाल्यानंतर भविष्यात काय होणार, या विचाराने अभिनेत्री पूर्णपणे हादरून गेली होती. तिला आपण कदाचित मरणार असल्याची भीती वाटत होती. त्या काळातील मानसिक अवस्था सांगताना तिने म्हटले की, “सगळं काही अंधारात बुडाल्यासारखं वाटत होतं. मला वाटलं की मी मरणार आहे. तो क्षण अत्यंत भीतीदायक होता आणि मला खूप एकटं वाटत होतं.” अशी भीषण आठवण अभिनेत्रीने सांगितली.

या अनुभवामुळे गंभीर आजाराशी झुंज देणाऱ्या रुग्णांच्या एकटेपणाची तिला नव्याने जाणीव झाली. आजारपणातील भीती आणि अनिश्चितता रुग्णाला आतून किती अस्वस्थ करते, हे इतरांना समजवून सांगणे अनेकदा कठीण असते, असेही तिने सांगितले.

मनीषा उपचारासाठी अमेरिकेतील न्यूयॉर्क येथील मेमोरियल स्लोन केटरिंग कॅन्सर सेंटरमध्ये दाखल झाली होती. तिथे तिच्यावर शस्त्रक्रिया आणि केमोथेरपी करण्यात आली. एप्रिल २०१३ मध्ये तिचे केमोथेरपीचे शेवटचे सत्र पूर्ण झाले आणि त्यानंतर ती कॅन्सरमुक्त झाली. मात्र, दरम्यानचा काळ तिच्यासाठी मानसिक आणि शारिरीक वेदना देणारा होता.

मनीषा कोईरालाने १९९१ मध्ये ‘सौदागर’ या चित्रपटातून बॉलिवूडमध्ये पदार्पण केले. त्यानंतर ‘१९४२: अ लव्ह स्टोरी’, ‘बॉम्बे’, ‘खामोशी: द म्युझिकल’, ‘दिल से…’, ‘गुप्त’, ‘लज्जा’ आणि ‘कंपनी’ यांसारख्या गाजलेल्या चित्रपटांमध्ये तिने आपल्या अभिनयाची छाप पाडली. आजही तिची मनोरंजन विश्वाशी नाळ जोडलेली असून, वेबसिरीजमध्ये लक्षवेधक भूमिकांमध्ये ती दिसली आहे. आगामी काळातही ती अनेक मोठ्या प्रोजेक्टमध्ये दिसू शकते.

Preity Zinta: ‘जिथून सगळं सुरू झालं…’; प्रीती झिंटाने शेअर केला ‘बंटवारा 1947’ मधील हमीदाचा खास लूक