धुळे : संपूर्ण महाराष्ट्रात गणेश विसर्जनाची धामधूम सुरू असताना धुळे जिल्ह्यातून एक मन हेलावून टाकणारी घटना समोर आली आहे. यामध्ये गणपतीच्या विसर्जन मिरवणुकीदरम्यान ट्रॅक्टरखाली चिरडून 3 चिमुकल्यांचा दुर्दैवी मृत्यू झाला आहे. तसेच ६ जण जखमी झाले आहेत. यामुळे परिसरात मोठ्या प्रमाणात शोककळा पसरली. काय घडले नेमके? धुळे शहराला लागून असलेल्या चित्तोड गावात एकलव्य मित्र मंडळाची विसर्जन मिरवणूक सुरू असताना एका ठिकाणी थांबून कार्यकर्ते नाचत होते. मद्यधुंद चालकाने ट्रॅक्टर अचानक सुरू केल्याने ट्रॅक्टर खाली येऊन तीन लहान बालकांचा मृत्यू झाला तर सहा जण जखमी झाले. या अपघातातील जखमींना तातडीने शहरातील हिरे वैद्यकीय महाविद्यालयामध्ये दाखल करण्यात आले. ट्रॅक्टर चालक दारू प्यायलेला होता. त्याच्या चुकीमुळे 3 चिमुकल्यांचा दुर्दैवी मृत्यू झाला आहे. परी शांताराम बागुल (वय १३), शेरा बापू सोनवणे (वय ६) लड्डू पावरा (वय ३) असे मृत पावलेल्या बालकांची नावे आहेत. या घटनेनंतर चिमुरड्यांच्या कुटुंबियांनी एकच आक्रोश केला. या घटनेचा तपास धुळे तालुका पोलीस करत आहेत.
