Dhule News : धुळे जिल्ह्यातील अवधान गावाजवळ मुंबई-आग्रा महामार्गावर हृदय पिळवटून टाकणारी दुर्घटना घडली आहे. भरधाव ट्रकने दुचाकीला पाठीमागून जोरदार धडक दिल्याने बाप-लेकाचा जागीच मृत्यू झाला, तर पत्नी आणि दीड वर्षांची मुलगी गंभीर जखमी झाल्या आहेत. मृतांमध्ये लक्ष्मण निंबा गुंजाळ (वय ३५) आणि त्यांचा तीन वर्षांचा मुलगा आदित्य लक्ष्मण गुंजाळ यांचा समावेश आहे. लक्ष्मण गुंजाळ हे पत्नी भाग्यश्री (वय ३०) आणि दोन लहान मुलांसह दुचाकीने गाणेगावकडे जात होते. अवधान गावाच्या हद्दीत एका हॉटेलसमोर भरधाव ट्रकने त्यांच्या दुचाकीला मागून जोरदार धडक दिली. या भीषण अपघातात लक्ष्मण आणि त्यांचा चिमुकला मुलगा आदित्य यांचा जागीच मृत्यू झाला. तर पत्नी भाग्यश्री आणि दीड वर्षांची मुलगी जयश्री या दोघी गंभीर जखमी झाल्या असून त्यांच्यावर उपचार सुरू आहेत. घटनेची माहिती मिळताच मोहाडी नगर पोलिसांनी तात्काळ घटनास्थळी धाव घेतली. स्थानिकांच्या मदतीने जखमींना त्वरित धुळे जिल्हा रुग्णालयात दाखल करण्यात आले. पोलिसांनी अपघातग्रस्त ट्रक जप्त केला असून चालकाला ताब्यात घेतले आहे. या प्रकरणी पुढील तपास सुरू आहे.
