Dharmaveer 2 | Sanjay Raut | Eknath Shinde – शिवसेना नेते आनंद दिघे यांच्या जीवनावर आधारित चित्रपटाचा दुसरा भाग “धर्मवीर 2” हा सिनेमा राजकीय हेतूने प्रेरित आहे असा आरोप ठाकरे गटाचे नेते संजय राऊत यांनी केला आहे.

या चित्रपटाच्या निर्मार्त्याने या सिनेमाद्वारे दिवंगत आनंद दिघे यांचा अवमान केला आहे असा आरोपही त्यांनी केला. दिघे हे महाराष्ट्राचे मुख्यमंत्री एकनाथ शिंदे यांचे राजकीय गुरू मानले जातात.

शिंदे यांनी उद्धव ठाकरे यांच्या विरोधात शिवसेनेत बंड पुकारले आणि ठाकरे यांच्या नेतृत्वाखालील आघाडी सरकार पाडून शिंदे मुख्यमंत्री बनण्याआधीच चित्रपटाचा पहिला भाग २०२२ मध्ये प्रदर्शित झाला होता.

शनिवारी ‘धर्मवीर 2’ चा ट्रेलर प्रदर्शित झाला. पत्रकारांशी बोलताना राऊत म्हणाले की, अविश्वासू लोक त्यांचे राजकीय हेतू पुढे नेण्यासाठी आणि त्यांच्या विश्वासघाताला कायदेशीर मान्यता देण्यासाठी दिघे यांच्या नावाचा गैरवापर करत आहेत.

पक्षाचे संस्थापक दिवंगत बाळासाहेब ठाकरे यांचे एकनिष्ठ असलेले दिघे यांच्याशी चित्रपटातील संवादांमधून खोटेपणा पसरवला जात आहे, असा आरोपही राऊत यांनी केला आहे. ते म्हणाले, दिघे यांच्या निधनाने चित्रपटाचा पहिला भाग संपला होता तर दुसरा भाग कसा निघू शकतो.

आगामी विधानसभा निवडणुका डोळ्यासमोर ठेवून हा चित्रपट प्रदर्शित होत असल्याचे त्यांनी सांगितले. राऊत यांनी दावा केला की हा चित्रपट राजकीयदृष्ट्या प्रेरित आणि बाळासाहेब ठाकरे आणि आनंद दिघे यांचा अनादर करणारा आहे.