पुणे: काल ४ मार्च सकाळपासूनच धनंजय मुंडे आपल्या मंत्रीपदाचा राजीनामा देणार असल्याच्या बातम्या माध्यमांत येत होत्या. अखेर धनंजय मुंडेंनी आपल्या मंत्रीपदाचा राजीनामा दिला. देशमुख यांच्या हत्येचे अंगावर काटा आणणारे फोटो व्हायरल झाल्यानंतर मुडेंना राजीनामा द्यावा लागला. त्यांच्या राजीनाम्यानंतर विधानसभासभेत विरोधकांनी मोठा गोंधळ घातला. यानंतर आता धनजंय मुंडेंनी आमदाराकीचाही राजीनामा द्यावा, अशी मागणी जोर धरू लागली आहे. मराठा समाजातील बांधव आक्रमक झाल्याचे पाहायला मिळत आहे. पुण्यात मराठा समाज आक्रमक पुणे शहरातील सकल मराठा समाज बांधवांनी जिल्हाधिकारी जितेंद्र हुडी यांच्याकडे धनंजय मुंडेंची पक्षातून हकालपट्टी करण्यात यावी, असे निवेदन दिले आहे. तसेच मुंडे यांनी आपल्या आमदारकीचा राजीनामा द्यावा यासाठी मराठा समाज आग्रही असल्याचे चित्र पाहायला मिळत आहे. जिल्हाधिकाऱ्यांना दिलेल्या निवेदनात पुण्यातील सकल मराठा समाजाने मुंडे यांची आमदारकी रद्द करण्याची मागणी केली आहे. आज धाराशिव बंदची हाक काल ४ मार्च रोजी देशमुख हत्या प्रकरणाचे फोटो आणि व्हिडिओ व्हायरल झाल्यानंतर बीड बंदची हाक देण्यात आली. यानंतर राजभरात विविध ठिकाणी बंदची हाक देण्यात येणार असल्याची माहिती मिळत आहे. आज ५ मार्च रोजी धाराशिव बंदची हाक देण्यात आली आहे. सकल मराठा समाज्याच्या वतीने हा बंद पुकारण्यात आला असून तसे निवेदन जिल्हाधिकाऱ्यांना देण्यात आले आहे. धनंजय मुंडे यांना सह आरोपी करा, कृष्णा आंधळे याला तात्काळ अटक करा व संतोष देशमुख यांच्या खुनातील सर्व आरोपींना फाशीचे शिक्षा द्या, या प्रमुख मागण्या या निवेदनात करण्यात आल्या आहेत. बार्शीत जोडे मारो आंदोलन बार्शी तालुक्यातील सकल मराठा समाज्याच्या वतीने धनंजय मुंडे यांच्या प्रतिकात्मक प्रतिमेस जोडो मारो आंदोलन करण्यात आले. फक्त राजीनामा नको, तर धनंजय मुंडेला सहआरोपी करण्याची मागणी बार्शी तहसीलदारांना देण्यात आलेल्या निवेदनात म्हटले आहे.
