Dhairyashil Kadam – देश सुदृढ व बलशाली करण्यासाठी आजची पिढी सशक्त व बलशाली बनवली पाहिजे. यासाठी व्यायामाचे संस्कार मुलांवर झाले पाहिजेत, असे आवाहन आमदार धैर्यशील कदम यांनी केले. येथील श्री चौंडेश्वरी एज्युकेशन सोसायटी व कुस्तीतील आशियाई रौप्य पदक विजेते शिवछत्रपती पुरस्काराने सन्मानित कै. पै. बाबुराव गणपतराव चव्हाण व्यायामशाळा यांच्या संयुक्त विद्यमाने कै. पै. बाबुराव गणपतराव चव्हाण स्मृतिदिन व सत्कार सोहळा शुक्रवारी झाला.

त्यावेळी प्रमुख पाहुणे म्हणून आ. कदम बोलत होते. अध्यक्षस्थानी आमदार मनोज घोरपडे होते. माजी नगराध्यक्ष संपतदादा माने, नगराध्यक्षा सौ. वैशाली माने उपस्थित होत्या. मुलांनी कसं जगावं, कसं वागावं, काय खावं याचं मार्गदर्शन शिक्षकांनी मुलांना करावे, असे धैर्यशील कदम यांनी सांगितले. या व्यायामशाळेमधून रहिमतपूरचे नाव आंतरराष्ट्रीय पातळीवर करणारे कुस्तीगीर तयार व्हावेत, अशी अपेक्षा त्यांनी व्यक्त केली.

मनोज घोरपडे म्हणाले, ‘‘मन, मनगट व मेंदू यांचा त्रिवेणी संगम झाला, यांचा विकास झाला की देशाचा विकास होतो. विद्यार्थ्यांचा सर्वांगीण विकास करण्यासाठी प्रयत्नशील असणाऱ्या या संस्थेच्यावतीने आदर्श व सर्व आधुनिक साधनांनी युक्त असे व्यायामशाळा तयार व्हावी.’’ नगराध्यक्षा सौ. वैशाली माने म्हणाल्या, ‘या व्यायामशाळेतून आंतरराष्ट्रीय पातळीवर महिला कुस्तीगीर तयार व्हाव्यात.

शिक्षिका सौ. स्वाती जाधव यांनी बाबुराव चव्हाण यांच्या कार्याचा आढावा घेतला. संपतदादा माने, कुस्तीगीर साक्षी मोरे यांनी मनोगत व्यक्त केले. याप्रसंगी तन्वी चांगदेव मोरे (कुस्तीगीर, सासुर्वे), सृष्टी अमोल मोरे (मुष्टीयोद्धा), राष्ट्रीय रौप्य पदक विजेती व राज्य सुवर्णपदक विजेती साक्षी संजय मोरे (सासुर्वे), शासनाचा सेंद्रिय कृषी भूषण पुरस्कार प्राप्त अनंत माने आदींचा सत्कार करण्यात आला.