बारामती : छत्रपती सहकारी साखर कारखान्याच्या पंचवार्षिक निवडणुकीसाठी गुरुवार दि(२४) रोजी राज्याचे उपमुख्यमंत्री अजित पवार इच्छुक उमेदवारांच्या मुलाखती घेणार आहेत. यावेळी क्रीडामंत्री दत्तात्रय भरणे देखील उपस्थित असणार आहेत. बारामती शहरातील इंम्पेरीअल बँक्वेट हॉलमध्ये मुलाखती पार पडतील. श्री जय भवानी माता पॅनलच्या माध्यमातून निवडणूक लढवली जात असून बहुचर्चित छत्रपती सहकारी साखर कारखान्याच्या निवडणुकीत कोणाला तिकीट मिळणार कुणाचा पत्ता कट होणार याकडे सर्वांचे लक्ष आहे.

गुरुवारी सकाळपासून उमेदवारांच्या मुलाखतीला सुरुवात होईल. यामध्ये गटनिहाय मुलाखती असल्याने जास्त गर्दी होणार नाही याची काळजी घेण्यात आली आहे असे संयोजकांनी सांगितले. सकाळी 9 ते 10 गुणवडीच्या सहाव्या गटातील उमेदवारांच्या मुलाखती होणार आहेत

सकाळी दहा ते अकरा सोनगाव या पाचव्या गटातील अर्ज भरलेल्या उमेदवारांची मुलाखत होणार असून 11 ते 12 या वेळेत लासुर्णे गटातील उमेदवारांच्या मुलाखती घेतल्या जाणार आहेत, तर दुपारी बारा ते एक या वेळेत दुसऱ्या क्रमांकाच्या सणसर मधून अर्ज भरलेल्या उमेदवारांची मुलाखत होणार आहे. दुपारी दोन ते तीन या वेळेत उद्धट गटातील तर दुपारी तीन ते चार या वेळेत अंथुर्णे गटातील उमेदवारांच्या मुलाखती होणार आहेत.

या व्यतिरिक्त गटातील व गटामधून इतर सर्वसाधारण जागांसाठी उमेदवारी मागितलेल्या उमेदवारांनी उपस्थित रहावे असे आवाहन कारखान्याचे माजी अध्यक्ष पृथ्वीराज जाचक व समन्वयक किरण गुजर यांनी केले आहे.