श्री क्षेत्र देहूगाव: राज्याचे उपमुख्यमंत्री तथा जिल्ह्याचे पालकमंत्री अजित पवार यांनी बुधवारी (दि. १८ जून) सकाळीच जगद्गुरु श्री संत तुकाराम महाराज संस्थान देहू येथील श्री विठ्ठल रखुमाई मंदिर, श्री संत तुकाराम महाराज शिळा मंदिर आणि श्रीराम मंदिरात दर्शन घेतले. दर्शनानंतर संस्थानच्यावतीने अजित पवार यांचा सत्कार करण्यात आला.

यावेळी आमदार सुनील शेळके, श्री संत तुकाराम महाराज संस्थानचे अध्यक्ष ह.भ.प. जालिंदर मोरे, पालखी सोहळा प्रमुख ह.भ.प. गणेश महाराज मोरे, ह.भ.प वैभव महाराज मोरे, ह.भ.प दिलीप महाराज मोरे, विश्वस्त ह.भ.प. विक्रमसिंह मोरे, ह.भ.प.उमेश महाराज मोरे, ह.भ.प. लक्ष्मण महाराज मोरे आदी उपस्थित होते.

भंडारा डोंगरावरील मंदिर निर्माणाची पाहणी

उपमुख्यमंत्री अजित पवार यांनी भंडारा डोंगर या पावन स्थळी भेट देऊन जगद्गुरू श्री संत तुकाराम महाराजांचे दर्शन घेतले. या भेटीप्रसंगी त्यांनी संत तुकाराम महाराजांच्या उभारण्यात येत असलेल्या भव्य मंदिर प्रकल्पाची सखोल पाहणी केली व कामाच्या प्रगतीचा आढावा घेतला. अजित पवार यांनी मंदिर परिसराचे नियोजन, रचना, श्रद्धास्थळ म्हणून भाविकांसाठी असणाऱ्या सोयीसुविधा, आणि भावी पिढ्यांसाठी संत साहित्य व अध्यात्मिक वारसा जपण्याच्या दृष्टीने सुरू असलेले हे कार्य फारच स्तुत्य असल्याचे मत व्यक्त केले.

तसेच स्थानिक अधिकाऱ्यांना कामे वेळेत व गुणवत्तेने पूर्ण होण्यासाठी आवश्यक त्या सूचना दिल्या. संत तुकाराम महाराजांचे कार्य, विचार आणि वारसा अखंडपणे टिकवणे हे आपल्या सगळ्यांचं कर्तव्य आहे, असेही त्यांनी स्पष्टपणे नमूद केले.