Delhi Vidhansabha Election । Bjp News – भाजपच्या नेतृत्वाखालील एनडीएने केंद्रात सलग तिसऱ्यांदा सरकार स्थापन केले. मात्र, सुमारे अडीच दशकांपासून भाजप दिल्ली विधानसभा निवडणूक जिंकू शकलेला नाही. त्यामुळे दिल्ली जिंकण्यासाठी त्या पक्षाने आतापासूनच मोर्चेबांधणी सुरू केली आहे.

भाजपच्या दिल्ली प्रदेश कार्यकारिणीची बैठक उद्या (रविवारी) होणार आहे. त्या बैठकीच्या अजेंड्यावर प्रामुख्याने आगामी विधानसभा निवडणुकीसाठीची तयारी हा मुद्दा असेल. देशाच्या राजधानीत पुढील वर्षीच्या फेब्रुवारीत विधानसभेचा रणसंग्राम अपेक्षित आहे.

त्यासाठी केवळ सात ते आठ महिन्यांचा अवधी बाकी आहे. त्यामुळे आगामी निवडणुकीला सामोरे जाण्याच्या दृष्टीने भाजपच्या गोटात हालचाली सुरू झाल्या आहेत. नुकत्याच झालेल्या लोकसभा निवडणुकीत भाजपची काही राज्यांत पीछेहाट झाली आहे.

मात्र, दिल्लीने त्या पक्षाला साथ दिली. दिल्लीतील लोकसभेच्या सर्व ७ जागा भाजपने जिंकल्या. विशेष म्हणजे, आप आणि कॉंग्रेस एकत्र असूनही भाजपने ती कामगिरी केली. त्यामुळे आगामी विधानसभा निवडणुकीला सामोरे जाण्यासाठी त्या पक्षाचे मनोबल उंचावले आहे.

दिल्लीत १९९८ पासून झालेली एकही विधानसभा निवडणूक भाजप जिंकू शकलेला नाही. संबंधित वर्षापासून सलग तीन कार्यकाळ दिल्लीत कॉंग्रेसची सत्ता होती. त्यानंतर आपने दिल्ली काबीज केली. त्यामुळे केंद्रात सत्ता मिळून आणि विविध राज्यांत झेंडा फडकावूनही भाजपसाठी दिल्ली दूरच राहिली.

साहजिकच, प्रदीर्घ काळ दिल्ली जिंकता न येण्याची बाब त्या पक्षाला राजकीयदृष्ट्या सलणारी आहे. आता लोकसभा निवडणुकीत दिल्लीत झालेली कामगिरी पक्षाच्या आशा पल्लवित करणारी ठरली आहे. त्यातूनच भाजपने आतापासूनच दिल्लीवर अधिक लक्ष केंद्रित करण्याचे ठरवलेले दिसते.