Delhi Pollution : राजधानी दिल्लीचा हवा गुणवत्ता निर्देशांक (AQI) १५३ वर पोहचली आहे. या बदलाच्या पार्श्वभूमीवर, हवा गुणवत्ता व्यवस्थापन आयोगाने (CAQM) एनसीआरमध्ये तात्काळ प्रभावाने GRAP स्टेज-I काढून टाकला आहे.

पर्यावरण मंत्री मनजिंदर सिंग सिरसा म्हणाले की, ‘हे यश नियमित देखरेख, वैज्ञानिक नियोजन आणि प्रभावी प्रदूषण नियंत्रण उपायांचे परिणाम आहे, जे येणाऱ्या पिढ्यांसाठी स्वच्छ आणि चांगल्या भविष्याचा आधार बनेल’.

यावेळी पर्यावरण मंत्री मनजिंदर सिंग सिरसा म्हणाले की, दिल्लीच्या हवेतील ही सुधारणा पर्यावरण संरक्षणासाठी आमच्या सरकारची वचनबद्धता दर्शवते. हवेची गुणवत्ता सुधारत राहावी यासाठी आम्ही सर्वतोपरी प्रयत्न करत राहू. असं देखील ते यावेळी म्हणाले.

वायू प्रदूषण नियंत्रित करण्यासाठी प्रभावी पावले उचलण्यावर भर :
१३ मार्च रोजी झालेल्या उच्चस्तरीय आढावा बैठकीत, मुख्यमंत्र्यांनी वायू प्रदूषणाचा सामना करण्यासाठी जलद आणि प्रभावी पावले उचलण्यावर भर दिला होता. त्यांच्या सूचनांनुसार, धूळ नियंत्रणासाठी कठोर नियम लागू करण्यात आले, औद्योगिक प्रदूषणावर बारकाईने लक्ष ठेवण्यात आले आणि विभागांमधील समन्वय मजबूत करण्यात आला.

२०२५-२६ च्या अर्थसंकल्पात मोठी तरतूद :
पर्यावरण संरक्षण अधिक प्रभावी करण्यासाठी दिल्ली सरकारने २०२५-२६ च्या अर्थसंकल्पात मोठी तरतूद केली आहे. पर्यावरण संरक्षणासाठी पर्यावरण आणि वन विभागाला ५०६ कोटी रुपये आणि प्रदूषण नियंत्रणासाठी ३०० कोटी रुपये देण्यात आले आहेत.

७० लाख झाडे लावण्याचे उद्दिष्ट :
याशिवाय, दिल्लीतील हिरवळ वाढवण्यासाठी आणि वायू प्रदूषण कमी करण्यासाठी ७० लाख झाडे लावण्याचे लक्ष्य ठेवण्यात आले आहे. याव्यतिरिक्त, रिअल-टाइम देखरेख सक्षम करण्यासाठी आणि हवेची गुणवत्ता सुधारण्यासाठी ६ नवीन सतत वातावरणीय हवा गुणवत्ता देखरेख केंद्रे (CAAQM) स्थापित केली जातील.

दिल्लीत हवामान कसे असेल?
हवामान खात्याच्या म्हणण्यानुसार, शनिवारी दिल्लीत कमाल तापमान २९.६ अंश सेल्सिअस नोंदवले गेले, जे हंगामी सरासरीपेक्षा तीन अंशांनी कमी आहे. किमान तापमान १५.५ अंश सेल्सिअस होते, जे सरासरीपेक्षा २.६ अंशांनी कमी होते.

दिवसभरात आर्द्रतेचे प्रमाण ३४ ते २३ टक्क्यांच्या दरम्यान चढ-उतार झाले. पुढील दोन दिवस जोरदार वारे वाहण्याची शक्यता आयएमडीने वर्तवली आहे. दरम्यान, मागील आठवड्यात दिल्लीत कडक उन्हाचा चटका जाणवत होता.