Delay in Lalbaugcha Raja Ganpati immersion : मुंबईतील गणेशोत्सवाचे प्रमुख आकर्षण असलेल्या लालबागच्या राजाच्या विसर्जन मिरवणुकीने आता अंतिम टप्प्यात प्रवेश केला आहे. शुक्रवारी दुपारी साडेबारा वाजण्याच्या सुमारास मंडपातून विसर्जनासाठी निघालेला लालबागचा राजा तब्बल १८ तासांच्या मोठ्या प्रवासानंतर शनिवारी सकाळी साडेसहाच्या सुमारास गिरगाव चौपाटी परिसरात दाखल झाला.

लालबाग, भायखळा आणि गिरगाव असा प्रवास करत लालबागचा राजा चौपाटीच्या दिशेने मार्गस्थ झाला. पहाटेपासूनच लालबागच्या राजाचे अंतिम दर्शन घेण्यासाठी गिरगाव चौपाटी परिसरात गणेशभक्तांची मोठी गर्दी झाली आहे. भाविकांच्या गर्दीमुळे परिसरात उत्साहाचे आणि भक्तिमय वातावरण पाहायला मिळत आहे.

लालबागचा राजा तराफ्यापर्यंत सुरक्षितपणे पोहोचावा यासाठी मंडळाच्या पदाधिकाऱ्यांकडून विशेष मानवी साखळी तयार करण्यात आली आहे. चौपाटीवर पोहोचल्यानंतर लालबागच्या राजाची आरती करण्यात येणार असून त्यानंतर विधिवत पद्धतीने विसर्जनाची प्रक्रिया पार पडणार आहे.

‘या’ कारणामुळे विसर्जनला विलंब होण्याची शक्यता

सध्या समुद्राला ओहोटी असल्याने विसर्जनाला विलंब होण्याची शक्यता आहे. समुद्राचे पाणी आत गेल्यामुळे तराफा ज्या ठिकाणी उभा करण्यात आला आहे, त्या पातळीपर्यंत पाणी पोहोचलेले नाही. त्यामुळे पाणी तराफ्याच्या पातळीपर्यंत येईपर्यंत लालबागच्या राजाला तराफ्यावर चढवता येणार नाही.

गेल्या वर्षीही अशाच परिस्थितीमुळे लालबागच्या राजाच्या विसर्जनाला विलंब झाला होता. यंदाही समुद्राच्या पाणीपातळीमुळे भाविकांना काही काळ प्रतीक्षा करावी लागू शकते. सूत्रांच्या माहितीनुसार, सकाळी ११ वाजण्याच्या सुमारास समुद्राला भरती येण्याची शक्यता आहे. त्यानंतर लालबागच्या राजाला तराफ्यावर चढवण्यात येईल. त्यामुळे लालबागच्या राजाचे प्रत्यक्ष विसर्जन दुपारी १२ ते १ वाजण्याच्या सुमारास होण्याची शक्यता आहे.

अजूनही ५० गणेशमृर्तींचे विसर्जन होणे बाकी

दरम्यान, गिरगाव चौपाटीवर अजूनही मोठ्या गणेशमूर्तींचे विसर्जन सुरु आहे. त्यामुळे मुंबईच्या गिरगाव चौपाटीवरील विसर्जन सोहळा संपायला आणखी काही तासांचा अवधी लागू शकतो. मुंबई उपनगरातील पवई तलावावरही असूनही जवळपास ५० मोठ्या गणेशमूर्तींचे विसर्जन होणे बाकी आहे.

हार्दिक पंड्याच्या पुनरागमनाची आशा पुन्हा धुळीस! IPL नंतर सलग चौथ्या मालिकेला मुकणार; नेमकं कारण काय?