Dehu News – देहू नगरपंचायत प्रशासनाच्या वतीने मालमत्ता व पाणी कर थकबाकीदारांविरुद्ध सुरू करण्यात आलेल्या विशेष वसुली मोहिमेला वेग आला असून, अवघ्या तीन दिवसांत १६ लाख रुपयांची वसुली करण्यात आली आहे. तसेच थकबाकी न भरणाऱ्या ३० थकबाकीदारांची नळजोड तोडण्यात आली आहे. थकबाकीदारांनी त्वरित कर भरून सहकार्य करावे, असे आवाहन कर अधीक्षक ज्ञानेश्वर शिंदे यांनी केले आहे. नगरपंचायतीसमोर चालू आर्थिक वर्षात मालमत्ता कर सुमारे १५ कोटी रुपये आणि पाणी कर ४ कोटी रुपये अशी एकूण १९ कोटी रुपयांच्या वसुलीचे मोठे आव्हान आहे. वित्त आयोगाच्या शिफारशीनुसार अनुदान मिळवण्यासाठी मालमत्ता कराची १०० टक्के वसुली अनिवार्य असल्याने मुख्याधिकारी चेतन कोंडे यांच्या मार्गदर्शनाखाली प्रशासनाने वसुली मोहीम अधिक तीव्र केली आहे. कर भरण्यास प्रोत्साहन देण्यासाठी मुदतीत (३० नोव्हेंबरपर्यंत) कर भरणाऱ्यांना १ टक्के सूट देण्यात आली होती. तसेच वेळेत कर भरणाऱ्या मिळकतधारकांसाठी कूपन वाटप करून लकी ड्रॉच्या माध्यमातून ५० गृहोपयोगी वस्तूंचे वितरण करण्यात आले होते. याशिवाय अभय योजनेअंतर्गत व्याजावर ५० टक्के सवलतही देण्यात आली होती.दरम्यान चालू आर्थिक वर्ष संपण्यास अवघा दीड महिना शिल्लक असल्याने प्रशासनाने थकबाकी वसुलीला गती दिली आहे. यासाठी थकबाकीदारांशी भ्रमणध्वनी व संदेशाद्वारे संपर्क साधणे, नोटिसा बजावणे तसेच परिसरात रिक्षामधून दवंडी पिटवून जनजागृती करण्यात येत आहे. तर सोमवारपासून वसुली पथकाने प्रत्यक्ष मोहिम सुरू केली आहे.दरम्यान, वसुलीदरम्यान अनेक ठिकाणी अनधिकृत नळजोड तसेच मोटरद्वारे पाणी उपसा केल्याचे आढळून आले आहे. अशा बेकायदेशीर नळजोडधारकांकडून २० हजार रुपयांपर्यंत दंड आकारण्यात येणार असल्याचे प्रशासनाने स्पष्ट केले आहे.
