Deepika Padukone and Muzammil Ibrahim: बॉलिवूड अभिनेत्री दीपिका पदुकोण पुन्हा एकदा चर्चेत आली आहे. मात्र, यावेळी कारण तिचा नवा चित्रपट किंवा सध्याचे वैयक्तिक आयुष्य नसून तिच्या भूतकाळातील नात्याबाबत करण्यात आलेला एक दावा आहे. मॉडेल आणि अभिनेता मुझम्मिल इब्राहिम याने नुकत्याच एका मुलाखतीत दीपिकासोबतच्या कथित रिलेशनशिपबाबत अनेक दावे केले आहेत. त्याच्या या वक्तव्यानंतर सोशल मीडियावर मोठी चर्चा सुरू झाली आहे.

मुझम्मिल इब्राहिमची एक जुनी मुलाखत सध्या सोशल मीडियावर पुन्हा व्हायरल होत आहे. या मुलाखतीत त्याने दावा केला की, तो आणि दीपिका पदुकोण काही वर्षांपूर्वी रिलेशनशिपमध्ये होते. इतकेच नाही, तर दीपिकानेच सर्वप्रथम त्याला प्रपोज केल्याचेही त्याने सांगितले.

मुलाखतीत मुझम्मिल म्हणाला, “दीपिका मुंबईत आल्यानंतर ज्या पहिल्या मुलाला डेट करत होती, तो मीच होतो. माझ्यासाठीही ते पहिले गंभीर नाते होते. आम्ही जवळपास दोन वर्षे एकमेकांना डेट केले. आमच्या नात्याची सुरुवात दीपिकाने मला प्रपोज केल्यापासून झाली होती.”

त्याने पुढे दावा केला की, या नात्याचा शेवट त्यानेच केला होता. “आमचा ब्रेकअप मी केला होता आणि त्या निर्णयाचा मला आजही कोणताही पश्चात्ताप नाही. मी निर्णय घेतला की मागे वळून पाहत नाही. त्यामुळे मला कोणाला सोडल्याचे कधीच वाईट वाटले नाही,” असेही तो म्हणाला.

मुझम्मिलने त्या काळातील आपल्या करिअरबाबतही भाष्य केले. त्याच्या मते, त्यावेळी तो अभिनेता म्हणून ओळखला जाऊ लागला होता, तर दीपिका फक्त मॉडेल म्हणून काम करत होती. “त्या काळात मी स्टार होतो, तर दीपिका अजून चित्रपटसृष्टीत आलेली नव्हती,” असा दावाही त्याने केला.

ब्रेकअपनंतर दीपिकासोबत संपर्क होता का, असा प्रश्न विचारण्यात आला असता मुझम्मिल म्हणाला, “आमचे नाते संपल्यानंतर आम्ही मित्र राहिलो. अधूनमधून एकमेकांशी बोलायचो. एखाद्या नवीन प्रोजेक्टसाठी किंवा यशासाठी एकमेकांचे अभिनंदनही करायचो. मात्र, दीपिकाचे रणवीर सिंहसोबत लग्न झाल्यानंतर आमचा संपर्क पूर्णपणे तुटला.”

मात्र, महत्त्वाची बाब म्हणजे दीपिका पदुकोणने कधीही सार्वजनिकरित्या मुझम्मिल इब्राहिमसोबत रिलेशनशिपमध्ये असल्याचे मान्य केलेले नाही किंवा त्याच्या या दाव्यांवर कोणतीही प्रतिक्रिया दिलेली नाही. त्यामुळे सध्या उपलब्ध माहिती ही केवळ मुझम्मिल इब्राहिमने केलेल्या दाव्यांवर आधारित आहे. दीपिकाकडून याबाबत कोणतेही अधिकृत स्पष्टीकरण आलेले नाही.

दरम्यान, दीपिका पदुकोण तिच्या अभिनयामुळे आणि वैयक्तिक आयुष्यामुळे नेहमीच चर्चेत असते. रणवीर सिंहसोबतच्या तिच्या लग्नानंतर दोघेही बॉलिवूडमधील लोकप्रिय जोडप्यांपैकी एक मानले जातात. अशातच मुझम्मिलच्या या जुन्या मुलाखतीतील वक्तव्यामुळे दीपिकाच्या भूतकाळातील कथित नात्याची पुन्हा चर्चा सुरू झाली आहे.

सोशल मीडियावर काही जण मुझम्मिलच्या दाव्यांवर विश्वास व्यक्त करत आहेत, तर अनेकजण या वक्तव्यावर प्रश्नचिन्ह उपस्थित करत आहेत. दीपिकाकडून प्रतिक्रिया येते का, याकडे आता चाहत्यांचे लक्ष लागले आहे.