Satara News – सातारा जिल्हा मध्यवर्ती सहकारी बँकेच्या निवडणुकीत उमेदवारी अर्ज दाखल करण्याचा टप्पा संपताच आता महायुतीतील जागावाटपाच्या चर्चेला निर्णायक वळण मिळण्याची शक्यता आहे. भाजप, शिवसेना आणि राष्ट्रवादी काँग्रेसमधील अनेक इच्छुकांनी विविध मतदारसंघांतून अर्ज दाखल केल्याने नेमकी कोणती जागा कोणत्या पक्षाच्या वाट्याला जाणार, याबाबतचे चित्र अद्याप स्पष्ट झालेले नाही.

त्यामुळे अर्जांची छाननी आणि उमेदवारांची अंतिम स्थिती स्पष्ट झाल्यानंतरच जागावाटपाचा निर्णय घेण्याची भूमिका सार्वजनिक बांधकाम मंत्री छत्रपती शिवेंद्रसिंहराजे भोसले यांनी मांडली.

सोसायटी मतदारसंघातून अर्ज दाखल केल्यानंतर पत्रकारांशी संवाद साधताना शिवेंद्रसिंहराजे यांनी महायुतीतील निवडणूक रणनीतीचे संकेत दिले. सध्या कोणताही अंतिम जागावाटपाचा फॉर्म्युला निश्चित झालेला नसून, सर्व घटक पक्षांतील इच्छुकांनी आपापल्या पातळीवर अर्ज दाखल केले आहेत. छाननीनंतर उपलब्ध पर्यायांचा विचार करून वरिष्ठ नेत्यांशी चर्चा केली जाईल, असे त्यांनी स्पष्ट केले.

जिल्हा बँकेची निवडणूक शक्यतो बिनविरोध करण्यासाठी महायुतीच्या वरिष्ठ पातळीवर प्रयत्न सुरू असल्याचेही त्यांनी सांगितले. मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि उपमुख्यमंत्री अजित पवार यांच्या मार्गदर्शनाखाली महायुती म्हणून समन्वयाने निर्णय घेतला जाईल, असे त्यांनी नमूद केले.

मात्र, बिनविरोध निवडणुकीची भूमिका आणि प्रत्यक्षात दाखल झालेल्या उमेदवारी अर्जांची संख्या यामुळे महायुतीतील अंतर्गत राजकीय गणित अधिक गुंतागुंतीचे झाले आहे. अनेक मतदारसंघांत एकापेक्षा अधिक घटक पक्षांचे इच्छुक समोर आल्याने अंतिम उमेदवारी निश्चित करताना स्थानिक राजकीय समीकरणांचा कस लागणार आहे.

जागावाटपात केवळ पक्षीय दावा निर्णायक ठरू नये, तर संबंधित नेत्याची स्थानिक पातळीवरील ताकद, प्रभाव आणि मतदारसंघातील स्वीकारार्हता यांचाही विचार व्हावा, अशी भूमिका शिवेंद्रसिंहराजे यांनी मांडली. त्यामुळे जिल्हा बँकेच्या जागावाटपाच्या निमित्ताने महायुतीतील स्थानिक नेतृत्वाचेही राजकीय वजन तपासले जाणार आहे.

दरम्यान, जिल्हा बँकेचा कारभार नियमबद्ध आणि पारदर्शक पद्धतीने सुरू असल्याचे सांगताना शिवेंद्रसिंहराजे यांनी बँकेच्या जडणघडणीत योगदान देणाऱ्या सर्वपक्षीय ज्येष्ठ नेत्यांचा उल्लेख केला. रिझर्व्ह बँक आणि नाबार्डच्या नियमांचे पालन करत बँकेची आर्थिक शिस्त कायम ठेवण्यात आल्याचे त्यांनी सांगितले.

उमेदवारी अर्ज दाखल होण्यापूर्वी सुरू असलेली राजकीय चर्चा आता अर्जांच्या छाननीनंतर अधिक स्पष्ट होणार आहे. कोणत्या मतदारसंघात कोणाचा दावा कायम राहतो, कोण माघार घेते आणि महायुतीतील घटक पक्षांमध्ये कोणत्या पद्धतीने तडजोड होते, यावर निवडणुकीचे पुढील चित्र अवलंबून राहणार आहे. त्यामुळे जिल्हा बँकेच्या जागावाटपाकडे महायुतीतील आगामी राजकीय समीकरणांच्या दृष्टीनेही पाहिले जात आहे.