Jalsa Bungalow : बाॅलिवूडचे ज्येष्ठ अभिनेते अमिताभ बच्चन यांच्या जुहू येथील ‘जलसा’ बंगल्याच्या मालकी हक्कावरून कौटुंबिक वाद निर्माण झाला आहे. अमिताभ यांचे धाकटे बंधू अजिताभ बच्चन यांच्या पत्नी रमोला बच्चन यांनी १९९३ मध्ये करण्यात आलेल्या गिफ्ट डीडला आव्हान दिले आहे.

या दस्तऐवजाद्वारे बंगल्याची मालकी जया बच्चन यांच्याकडे हस्तांतरित करण्यात आली होती. मात्र, आपली माहिती किंवा संमती न घेता हा व्यवहार झाल्याचा दावा रमोला यांनी केला आहे.

‘मुंबई मिरर’च्या वृत्तानुसार, रमोला बच्चन यांनी गेल्या सात महिन्यांत नोंदणी विभागाच्या अधिकाऱ्यांकडे अनेक तक्रारी दाखल केल्या आहेत. वादग्रस्त गिफ्ट डीड होण्यापूर्वी ‘जलसा’ बंगला आपल्या नावावर नोंदणीकृत होता, असा त्यांचा दावा आहे. विशेष म्हणजे, या मालमत्तेच्या मालकी हक्काबाबत वेगवेगळ्या सरकारी आणि संस्थात्मक नोंदींमध्ये तफावत असल्याचे समोर आले आहे.

‘कपोल हाउसिंग सोसायटी’च्या कागदपत्रांमध्ये जया बच्चन यांचे नाव मालक म्हणून नोंदवले आहे. मात्र, महाराष्ट्र सरकारच्या प्रॉपर्टी कार्डवर अद्याप रमोला बच्चन यांचे नाव असल्याचे सांगण्यात येत आहे. सरकारी नोंदींमधून आपले नाव हटवून जया बच्चन यांचे नाव नोंदवण्याचे प्रयत्न सुरू झाल्यानंतर हा वाद पुन्हा चर्चेत आला.

१९९३ मध्ये तयार करण्यात आलेल्या गिफ्ट डीडच्या वैधतेवरही रमोला यांनी प्रश्न उपस्थित केले आहेत. हा दस्तऐवज साध्या कागदावर तयार करण्यात आला होता. त्यावेळी मुद्रांक शुल्क भरले नव्हते आणि त्यावर साक्षीदारांच्या सह्याही नव्हत्या, असे आरोप त्यांनी तक्रारीत केले आहेत. त्यानंतर या दस्तऐवजाची नोंदणी कशी झाली आणि महाराष्ट्र सरकारच्या अभय योजनेअंतर्गत त्याला नियमित कसे करण्यात आले, याचीही चौकशी करण्याची मागणी त्यांनी केली आहे.

हा वाद आता अंधेरी येथील सहकारी संस्थांच्या उपनिबंधक कार्यालयापर्यंत पोहोचला आहे. उपनिबंधक फैयाज मुलानी यांनी तक्रार मिळाल्याची पुष्टी केली आहे. या प्रकरणाची सुनावणी सुरू झाली असून, संबंधित पक्षांना आपले म्हणणे मांडण्यास सांगण्यात आले आहे. अधिकारी तक्रारीतील आरोप आणि संबंधित कागदपत्रांची तपासणी करत आहेत.

दरम्यान, या प्रकरणावर अमिताभ बच्चन यांनी अद्याप प्रतिक्रिया दिलेली नाही. जया बच्चन यांच्याशीही संपर्क होऊ शकला नाही. अभिषेक बच्चन यांच्या प्रवक्त्याने हा कुटुंबाचा अंतर्गत विषय असल्याचे सांगत प्रतिक्रिया देण्यास नकार दिला.

या प्रकरणात अद्याप गिफ्ट डीडची वैधता किंवा मालकी हक्काबाबत अधिकाऱ्यांनी कोणताही अंतिम निर्णय दिलेला नाही. त्यामुळे जलसा बंगल्याच्या मालकीवरून सुरू झालेला हा वाद सध्या चौकशी आणि सुनावणीच्या टप्प्यात आहे.