पिंपरी:  गुलइन बॅरी सिंड्रोमच्या संशयित आजाराने एका ३६ वर्षीय तरुणाचा मृत्यू झाला आहे. रुग्ण २१ जानेवारीपासून पिंपरी-चिंचवड महापालिकेच्या पिंपरी येथील कै. यशवंतराव चव्हाण स्मृती रुग्णालय येथे दाखल होता. उपचारादरम्यान या रुग्णाचा मृत्यू झाला आहे. रुग्णाचा गुलइन बॅरी सिंड्रोम या आजाराने मृत्यू झाला नसून, नेमलेल्या तज्ज्ञांच्या समितीने या रुग्णाचा अन्य आजारांमुळे मृत्यू झाल्याचा अहवाल दिला आहे.

रुग्ण पिंपळे-गुरव येथे राहत होता आणि कॅब चालवून उदरनिर्वाह करत होता. या रुग्णावर 21 जानेवारीपासून महापालिकेच्या यशवंतराव चव्हाण स्मृती रुग्णालय वैद्यकीय उपचार सुरू होते. उपचारादरम्यान या रुग्णाचा मृत्यू झाला आहे. कै. यशवंतराव चव्हाण स्मृती रुग्णालय येथील तज्ज्ञ समितीने सदर मृत्यूचे अन्वेषण केले असून रुग्णाचा मृत्यू न्युमोनिया मुळे श्वसन संस्थेस झालेला आघात व त्यामुळे श्वास घेण्यास त्रास झाल्याने झाला आहे. रुग्णास गुलइन बॅरी सिंड्रोम हा आजार देखील होता, असे तज्ज्ञ समितीचे मत आहे. रुग्णाची 22 जानेवोरीला नर्व्ह कंडक्शन ही चाचणी झाली होती.

तज्ज्ञ समितीने दिलेल्या कारणांनुसार सेव्हर अॅक्युट रेस्पिरेटरी डिस्ट्रेस सिंड्रोम अर्थात श्वसनक्रियेवर आघात होणे हे मृत्यूचे मुख्य कारण या शिवाय बायलॅटरल न्यूमोनिया असल्याचे तज्ज्ञ समितीच्या अहवालात सांगितले आहे. यासोबत जीबीएसची देखील लागण झाली असल्याचे अहवालात म्हटले आहे. उल्लेखनीय बाब अशी की यापूर्वी देखील जीबीएसमुळे एका महिला रुग्णाचा मृत्यू झाला होता. तेव्हा देखील मृत्यू जीबीएसमुळे झाला नसून इतर कारणांनी झाला असल्याने महापालिकेच्या वैद्यकीय विभागाकडून सांगण्यात आले होते.

पालिकेने सुरू केली हेल्पलाइन

मृत पावलेल्या रुग्णाला जीबीएससोबतच नमूद केल्याप्रमाणे इतर आजारही होते. त्यामुळे नागरिकांनी घाबरून जाऊ नये, तसेच गुलेन बॅरी सिंड्रोमया आजाराची योग्य माहिती नागरिकांपर्यंत पोहचावी व नागरिकांच्या शंकांचे निरसन व्हावे, याकरिता पिंपरी चिंचवड महापालिकेकडून हेल्पलाइन सुरु करण्यात आली आहे. ही हेल्पलाइन 24 तास उपलब्ध असेल. शंका समाधानासाठी या हेल्पलाइन क्रमांकावर तज्ज्ञ वैद्यकीय अधिकारी 24 तास उपलब्ध असतील. नागरिक या आजाराबद्दल चौकशीकरिता 7758933017 या दूरध्वनी क्रमांकावर फोन करू शकतात, असे महापालिका प्रशासनाने कळविले आहे.

 

हेही वाचा
Pimpri : जीबीएसचा तिसरा बळी! पिंपरीतील ३६ वर्षीय युवकाचा उपचारादरम्यान मृत्यू