पिंपरी -गेल्या दोन दिवसांपासून महापालिकेसमोर कंत्राटी सफाई कर्मचारी आंदोलन करत आहेत. मंगळवारी एका सफाई कर्मचाऱ्याचा मृत्यू झाल्यानंतर मृतदेह रुग्णवाहिकेतून आंदोलन स्थळी आणण्यात आला आणि काही काळासाठी वातावरण तणावपूर्ण झाले होते. ठेकेदारांकडून गेल्या दोन-तीन महिन्यांपासून पगार मिळत नसल्याने पालिकेसमोर आंदोलन सुरू आहे. सोमवारी तो कर्मचारी देखील आंदोलनात होता, असा दावा आंदोलकांकडून करण्यात आला. महापालिका आयुक्‍त व ठेकेदारावर ऍट्रॉसिटीअंतर्गत गुन्हा दाखल करण्याची मागणी होऊ लागली. त्यावर कार्यवाही करण्याचे आश्‍वासन मिळाल्यानंतर मृतदेह अंत्यसंस्कारासाठी रवाना केल्याने वातावरणातील तणाव काही प्रमाणात निवळला. मात्र, त्यानंतरही महिला सफाई कर्मचाऱ्यांचे आंदोलन सुरूच ठेवण्याचा निर्णय झाला.

महापालिकेच्या कंत्राटी सफाई कामगार महिलांनी सोमवारपासून ठिय्या आंदोलन सुरू केले आहे. रात्री देखील महिला कामगार महापालिका भवनासमोर बसून होत्या. महिला दिनीदेखील हे आंदोलन सुरूच होते. आयुक्त दालनासमोर देखील महिलांनी दुपारी तासभरासाठी ठिय्या आंदोलन केले. मात्र, या आंदोलनाची आयुक्तांनी दखल घेतली नसल्याचे आंदोलकांकडून सांगण्यात आले.
दरम्यान, या आंदोलनात सफाई कामगार हिरामण पिट्टु यादव (वय 58, रा. कासारवाडी) हे रविवारी सहभागी झाले होते. ह प्रभागातील सफाईच्या कामाचा ठेका बदलल्याने, पुन्हा कामावर रुजू होण्याकरिता ठेकेदाराने केलेल्या मागणीनुसार यादव हे कागदपत्रे जमा करत होते. ही कागदपत्रे जमा करत असतानाच कासारवाडी येथे त्यांचा मृत्यू झाला. ही बाब समजातच आंदोलनातील वातावरण तणावाचे बनले. आंदोलकांनी दिलेल्या माहितीनुसार ठेकेदाराकडून तीन महिन्याचा पगारच मिळाला नसल्याने एका महिला कर्मचाऱ्याने आत्महत्येचा प्रयत्न केला होता. त्यातच यादव यांच्या मृत्यूने त्यात भर पडली.

या घटनेनंतर कष्टकरी कामगार पंचायतीच्या वतीने बाबा कांबळे यांच्या नेतृत्वाखाली शिष्टमंडळाने महापालिका आयुक्‍त राजेश पाटील यांची भेट घेतली. मात्र या चर्चेतून फारसे काही साध्य झाले नाही. दरम्यान, मंगळवारी (दि.8) यादव यांचा मृतदेह रुग्णवाहिकेतून महापालिकेच्या प्रवेशद्वारासमोर आणून ठेवल्याने वातावरण तणावाचे बनले. त्यानंतर यादव यांच्या नातेवाइकांनी एकच आक्रोश केला.
दरम्यान, परिस्थिती हाताबाहेर जाऊ नये, याकरिता महापालिका प्रवेशद्वारासमोर मोठा पोलीस बंदोबस्त तैनात करण्यात आला होता.

यावेळी यादव यांच्या मृत्यूप्रकरणी महापालिका आयुक्‍त व संबंधित ठेकेदार यांच्या अनुुसूचित जाती प्रतिबंधक कायद्याअंतर्गत गुन्हा दाखल करण्याच निवेदन पोलिसांच्या वतीने सहाय्यक पोलीस आयुक्‍त सागर कवडे यांनी स्वीकारले. तर सहाय्यक आरोग्य आधिकारी राजेश भाट यांनी महापालिकेच्या वतीने निवेदन स्वीकारले. यादव यांच्या कुटुंबीयांना महापालिका प्रशासनाने नुकसान भरपाई द्यावी. तसेच त्यांच्या वारसांपैकी एका व्यक्‍तीला महापालिका सेवेत कायमस्वरुपी रुजू करुन घ्यावे, अशा मागण्या या निवेदनात केल्या आहेत.