Vadgaon Maval Results। राज्यातील २८८ नगर परिषद आणि नगर पंचायतीच्या मतमोजणीला सकाळी दहा वाजल्यापासून सुरुवात झाली आहे. मतमोजणीला सुरुवात झाल्यानंतर अवघ्या काही मिनिटात सुरूवातीचे कल हाती आले आहेत. राज्यभरात सगळीकडे भाजप आघाडीवर असल्याचे समोर येत आहे. त्यापाठोपाठ शिंदे गट आणि अजित पवार गटाची देखील आघाडीवर येत असल्याचे दिसत आहे. महाविकास आघाडीतील काँग्रेस, ठाकरे गट आणि शरद पवार गट मात्र पिछाडीवर असल्याचे दिसत आहेत. दरम्यान, राज्यातला पहिला निकाल हाती लागला आहे. अजित पवारांच्या राष्ट्रवादीने बाजी मारली आहे. वडगाव मावळ नगरपंचायत निवडणुकीत हा पहिला निकाल हाती आला आहे. राष्ट्रवादी काँग्रेस अजित पवार गटाच्या उमेदवार सुनीता राहुल ढोरे या निवडून आल्या आहेत. त्या नगरसेवक पदाच्या उमेदवार होत्या. अवघ्या एका मताने त्यांनी निवडणूक जिंकली आहे. सुनीता ढोरे या प्रभाग क्रमांक चार मधून निवडणूक लढवत होत्या. त्यांना एकूण ३२३ मतं मिळाली. त्यांनी भाजपच्या पूजा अतिश ढोरे यांना एक मताने पराभूत केले आहे. वडगाव मावळमध्ये सुरुवातीपासूच चुरस बघायला मिळाली आहे. याठिकाणी नगराध्यक्ष पदासह नगरसेवक पदाच्या सर्वच 17 जागांसाठी प्रामुख्याने भाजप विरुद्ध राष्ट्रवादी काँग्रेस अजित पवार गट अशी थेट लढत झाली. काही प्रभागांमध्ये अपक्षांच्या उमेदवारीमुळे तिरंगी लढत झाली. बहुतांश ठिकाणी मोठ्या घराण्यांचे उमेदवार समोरासमोर असल्याने भावकी भावकीत तर काही ठिकाणी दोन भावकीमध्ये लढत झाल्याने या निवडणुकीसाठी सर्वांनीच जोर लावला होता.
