पुणेः मुळा-मुठा नदीत रसायनयुक्त दूषित पाणी आल्याने नदीतील हजारो माशांचा मृत्यू झाल्याची धक्कादायक घटना समोर आली आहे. या घटनेने पुन्हा एकदा मुळा-मुठा नदीच्या पाण्याबाबत अनेक प्रश्न निर्माण झाले आहेत. या रसायनयुक्त पाण्यामुळे हजारो माशांचा खच नाईक बेट परिसरात आढळल्याने एकच खळबळ उडाली आहे. या घटनेची माहिती पुणे महापालिकेला मिळताच पालिकेचे कर्मचारी या ठिकाणी दाखल झाले आणि त्यांनी पाण्याचे नमुने प्रयोगशाळेला तपासणीसाठी पाठवले आहेत. हे रसायुक्त पाणी नदीपात्रात कसे आले याचा शोध घेण्यात येत आहे.

पुणे शहरातून मुळा-मुठा नदी वाहत असून संगमवाडी या ठिकाणी या दोन्ही नद्यांचा संगम होतो. महापालिकेतर्फे नदीतील प्रदूषण रोखण्यासाठी अनेक उपाययोजना करण्यात येत असल्या, तरी मोठ्या प्रमाणावर रसायनयुक्त पाणी नदी पात्रात सोडण्यात येत आहे. याचा परिणाम नदी प्रदूषित होत असून नागरिकांच्या आरोग्याचा प्रश्न देखील ऐरणीवर आला आहे.

मुठा नदी पात्रात सांडपाणी येत असून, मुळा नदी पात्रात पिंपरी-चिंचवड भागात असणाऱ्या कंपन्यांचे सांडपाणी सोडण्यात येत आहे. या प्रदूषणयुक्त पाण्यामुळे हजारो मृत माशांचा खच संगवाडी येथे आढळून आला आहे. यामुळे येथील परिसरात मोठ्या प्रमाणावर दुर्गंधी पसरली आहे. महापालिकेने पाण्याचे नमुने तपासणीसाठी प्रयोगशाळेत पाठवले असून त्याचा अहवाल येत्या दोन ते दिवसांत प्राप्त होणार आहे. या अहवालानंतरच नदीपात्रातील माशांचा मृत्यू नेमका कशामुळे झाला, हे स्पष्ट होणार असल्याचे पालिकेच्या वतीने सांगण्यात आले आहे.