Rohit Sharma Sets Record with 50 Sixes Against DC in IPL 2025 : मुंबई इंडियन्सचा सलामीवीर रोहित शर्मा आयपीएल २०२५ मध्ये मोठी खेळी खेळण्यास उत्सुक आहे. रविवारी दिल्ली कॅपिटल्सविरुद्धही तो मोठा प्रभाव पाडण्यात अपयशी ठरला. दिल्लीतील अरुण जेटली स्टेडियमवर त्याने १२ चेंडूत १८ धावा केल्या, ज्यात दोन चौकार आणि एका षटकाराचा समावेश होता. पाचव्या षटकात युवा फिरकी गोलंदाज विप्राज निगमने त्याला एलबीडब्ल्यूचा आऊट केले. परंतु, रोहितने त्याच्या या छोट्या खेळीच्या जोरावर एक खास पराक्रम केला आहे. यासह त्याने धोनीला मागे टाकले.

रोहित शर्माने धोनीला टाकले मागे –

खरं तर, ‘हिटमॅन’ म्हणून प्रसिद्ध असलेला रोहित आयपीएलमध्ये एकाच संघाविरुद्ध ५० षटकार मारणारा पहिला भारतीय खेळाडू बनला आहे. त्याने हा विक्रम महान यष्टिरक्षक-फलंदाज एमएस धोनीला मागे टाकून आपल्या नावावर केला. धोनीने आरसीबी विरुद्ध आतापर्यंत ४९ षटकार मारले आहेत. त्याच वेळी, आरसीबीचा स्टार फलंदाज विराट कोहली यादीत संयुक्तपणे तिसऱ्या स्थानावर आहे. कोहलीने सीएसके विरुद्ध ४३ षटकार मारले आहेत. दिल्ली संघाचा भाग असलेल्या केएल राहुलने आरसीबीविरुद्ध ४३ षटकार मारण्याचा पराक्रम केला आहे.

सामन्याबद्दल बोलायचे झाले तर, मुंबईने प्रथम फलंदाजी करताना दिल्लीविरुद्ध निर्धारित २० षटकांत ५ बाद २०५ धावा केल्या. मुंबईसाठी. रोहित आणि रिकेल्टन (२५ चेंडूत ४१ धावा, पाच चौकार, दोन षटकार) यांनी पहिल्या विकेटसाठी ४७ धावांची भागीदारी केली. रोहितला चालू हंगामात पाच सामन्यांमध्ये फक्त ५६ धावा करता आल्या आहेत. रोहित पॅव्हेलियनमध्ये परतल्यानंतर सूर्यकुमार यादवने (२८ चेंडूत ४० धावा, ५ चौकार, २ षटकार) चांगली खेळी केली.

हेही वाचा – RR vs RCB : ‘मला माहित होते की….’, सॅमसनने स्वतः सांगितले की आरसीबीने कुठे मारली बाजी?

मधल्या षटकांमध्ये सातत्याने विकेट्स पडल्याने, मुंबई २०० धावांपर्यंत पोहोचू शकणार नाही, असे वाटत होते पण तिलक वर्मा (३३ चेंडूत ५९ धावा, सहा चौकार, तीन षटकार) आणि नमन धीर (१७ चेंडूत नाबाद ३८ धावा, तीन चौकार, दोन षटकार) यांनी ६२ धावा करून संघाला दोनशे धावांचा टप्पा पार करुन दिला. ज्यामुळे मुंबईने दिल्ली कॅपिटल्ससमोर २०६ धावांचे लक्ष्य ठेवले आहे.