पिंपरी – गणरायाच्या आगमनाला अवघा एक दिवस उरल्याने पिंपरी-चिंचवडमधील गणेशोत्सवाची तयारी आता अंतिम टप्‍प्‍यात आली आहे. बाजारपेठांमध्ये सजावटीच्या साहित्याची रेलचेल पाहायला मिळत आहे. यंदा विद्युत रोषणाईला विशेष पसंती मिळत आहे. फिरती सुदर्शन चक्रे, निऑन आणि रोप लाइट्स, तसेच पाना-फुलांच्या विद्युत माळांनी ग्राहकांचे लक्ष वेधले आहे.

पिंपरी कॅम्प, चिंचवड स्टेशन, भोसरी आणि आकुर्डी परिसरातील बाजारपेठांमध्ये गणेशभक्तांची गर्दी वाढली आहे. घरगुती गणपतींपासून सार्वजनिक मंडळांपर्यंत सजावटीची तयारी अंतिम टप्प्यात आली आहे. त्यामुळे विद्युत साहित्याच्या दुकानांमध्ये खरेदीची लगबग सुरू आहे.
यंदा पारंपरिक विद्युत माळांसोबत अनेक आकर्षक प्रकार बाजारात दाखल झाले आहेत.

दोन बाय दोन आकाराची फिरती सुदर्शन चक्रे विशेष आकर्षण ठरत आहेत. देखाव्याला वेगळा उठाव देण्यासाठी रोप आणि निऑन लाइट्सचा वापर केला जात आहे. पाना-फुलांच्या विद्युत माळा नैसर्गिक फुलांसारखा भास निर्माण करतात. त्यामुळे त्यांनाही चांगली मागणी आहे.

एलईडी दिव्यांनी सजवलेली मोराची डिझाइन्स आणि चक्र मखरही ग्राहकांच्या पसंतीस उतरत आहेत. विविध आकार आणि डिझाइनमधील चक्री माळा बाजारात उपलब्ध आहेत. घरातील आरास अधिक आकर्षक करण्यासाठी नागरिकांकडून या साहित्याची खरेदी केली जात आहे. दोन बाय दोन आकाराच्या फिरत्या चक्रांची किंमत सुमारे ७५० रुपयांपासून सुरू आहे.

पाना-फुलांच्या विद्युत माळा ६०० रुपयांपासून उपलब्ध आहेत. रोप लाइटचा दर सुमारे ४० रुपये मीटर आहे. निऑन लाइट सुमारे ७० रुपये मीटर आहे. चक्री माळा २०० ते ८०० रुपयांपर्यंत मिळत आहेत.

मंडळांत अाणि घरोघरी तयारी
सार्वजनिक गणेश मंडळांचा भर भव्य सजावटीवर आहे. मंडप आणि परिसर उजळण्यासाठी लांब विद्युत माळा आणि रोप लाइट्सची खरेदी केली जात आहे. रस्त्यालगत आणि मंडपाबाहेर मोठ्या प्रमाणात रोषणाई करण्याची तयारी मंडळांकडून सुरू आहे. घरगुती गणपतीसाठी मात्र साधी आणि देखणी सजावट करण्याकडे नागरिकांचा कल आहे.

कमी वीज वापरणाऱ्या एलईडी माळांना मागणी आहे. लुकलुकणारे दिवे आणि नाजूक फुलांच्या माळांनी घरातील गणेश सजावट करण्याला पसंती मिळत आहे. गणेशोत्सवाची अंतिम टप्‍प्‍यात आल्‍याने तसेच आगामी दसरा, दिवाळीच्‍या पाश्‍र्वभूमीवर सजावटीच्या साहित्याची विक्री आणखी वाढण्याची शक्यता आहे. त्यामुळे पिंपरी-चिंचवडच्या बाजारपेठांमध्ये सध्या बाप्पाच्या स्वागताचा उत्साह आणि दिव्यांचा झगमगाट असे चित्र पाहायला मिळत आहे.

विद्युत साहित्याबरोबरच कृत्रिम फुलांच्या माळांनाही मागणी आहे. कलाबुतीच्या माळा, सोनेरी हंड्यांच्या माळा आणि पाण्यात ठेवण्यासाठीची कृत्रिम कमळे बाजारात उपलब्ध आहेत. या सजावटीच्या साहित्याची किंमत साधारण ७० ते २०० रुपयांपर्यंत आहे. कमी जागेत आकर्षक आरास करण्यासाठी त्यांचा वापर केला जात आहे.

Bhausaheb Rangari Ganpati: श्रीमंत भाऊसाहेब रंगारी गणपतीचा ऐतिहासिक देखावा! ‘श्रीगणेश सुवर्णधाम’ पाहण्यासाठी पुणेकरांची गर्दी होणार