Daund News – दौंड मतदारसंघातील महत्त्वाच्या तीर्थक्षेत्रांचा कायापालट करून भाविकांना उत्तम सुविधा उपलब्ध करून देण्यासाठी राहुल कुल यांनी विधानसभेत केलेल्या पाठपुराव्याला मोठे यश मिळाले आहे. राहू येथील श्री शंभू महादेव मंदिर, कुसेगावचे भानोबा देवस्थान आणि नारायण बेट (देऊळगाव गाडा) येथील नारायण बेट देवस्थान या तीर्थक्षेत्रांना ‘ब’ वर्ग दर्जा देण्यात येऊन त्यांच्या विकासासाठी प्रत्येकी ५ कोटी रुपयांचा निधी उपलब्ध करून देण्याचे आश्वासन राज्य सरकारने दिले आहे. विधानसभेत ‘अर्धा तास चर्चे’च्या माध्यमातून आमदार कुल यांनी हा प्रश्न आक्रमकपणे मांडला. यावेळी केवळ या तीनच नव्हे, तर केडगावचे पद्मावती माता मंदिर, रोटीचे रोटमलनाथ मंदिर आणि राजेगावचे राजेश्वर मंदिर या देवस्थानांच्या विकासासाठीही तातडीने कार्यवाही करण्याची मागणी त्यांनी केली. या प्रश्नाला उत्तर देताना ग्रामविकास मंत्री जयकुमार गोरे यांनी सांगितले की, दौंडमधील या तीर्थक्षेत्रांचे धार्मिक महत्त्व मोठे असून भाविकांची संख्याही लक्षणीय आहे. राहू, कुसेगाव आणि नारायण बेट येथील देवस्थानांना ‘ब’ वर्ग दर्जा देण्याबाबतच्या प्रस्तावातील त्रुटी जिल्हा परिषदेकडून तातडीने दूर करण्यात येतील. तसेच प्रत्येक देवस्थानाच्या बळकटीकरणासाठी ५ कोटी रुपयांचा निधी शासनाकडून देण्यात येईल. नारायण बेट येथील वनक्षेत्रातील जागा, तसेच पोलीस अधीक्षक कार्यालयाकडून भाविकांच्या संख्येचा दाखला मिळविणे अशा तांत्रिक बाबीही तातडीने निकाली काढण्याचे निर्देश प्रशासनाला देण्यात आले आहेत. दरम्यान, आमदार कुल यांनी दौंडमधील इतर ‘क’ वर्ग तीर्थक्षेत्रांनाही ‘ब’ वर्गात समाविष्ट करण्याची मागणी कायम ठेवली. केडगाव, रोटी आणि राजेगाव येथील प्रस्तावांची पडताळणी करून निकषात बसणाऱ्या सर्व देवस्थानांना न्याय दिला जाईल, असे आश्वासन मंत्री गोरे यांनी दिले. “मतदारसंघातील धार्मिक व सांस्कृतिक वारसा जपण्यासाठी आम्ही कटिबद्ध आहोत. केवळ दर्जा वाढवणे नव्हे, तर भाविकांना रस्ते, पाणी, भक्तनिवास यांसारख्या सर्व सोयी उपलब्ध व्हाव्यात हा उद्देश आहे. शासनाने दिलेल्या निधीमुळे या देवस्थानांच्या विकासाला मोठी गती मिळेल.” – अॅड. राहुल कुल,आमदार, दौंड तालुका.
