Dating Apps: व्हॅलेन्टाईन्स डे जवळ येत असताना डेटिंग अॅप्स वापरणाऱ्यांसाठी एक महत्त्वाची आणि चिंताजनक बातमी समोर आली आहे. Bumble आणि Tinder ची पॅरेंट कंपनी Match Group यांच्यावर सायबर हल्ला करण्याचा प्रयत्न झाल्याची माहिती समोर आली आहे. या काळात डेटिंग अॅप्सवर मोठ्या प्रमाणात ट्रॅफिक असतो, त्यामुळे हॅकर्सने हीच संधी साधली असल्याचे सांगितले जात आहे. मिळालेल्या माहितीनुसार, हा सायबर हल्ला कोणत्याही तांत्रिक त्रुटीमुळे नाही, तर मानवी चुकांमुळे झाला. हॅकर्सने फिशिंग ईमेल्सच्या माध्यमातून काही कर्मचाऱ्यांची आणि कॉन्ट्रॅक्टर्सची लॉगिन माहिती मिळवली आणि त्याद्वारे कंपनीच्या अंतर्गत सिस्टीममध्ये घुसखोरी केली. Bumble कंपनीने स्पष्ट केले आहे की, एका कॉन्ट्रॅक्टरने फिशिंग ईमेलला प्रतिसाद दिल्यामुळे हॅकर्सना काही काळासाठी प्रवेश मिळाला होता. मात्र, वेळेत त्यांना सिस्टीममधून बाहेर काढण्यात आले असून कोणत्याही युजरचे अकाउंट, पासवर्ड किंवा चॅट लीक झालेले नाहीत. Dating App Match Group ने देखील 16 जानेवारी रोजी सायबर हल्ल्याचा प्रयत्न झाल्याची कबुली दिली आहे. ShinyHunters या हॅकिंग ग्रुपने याची जबाबदारी स्वीकारली असली, तरी कंपनीचा दावा आहे की युजर्सचा लॉगिन डेटा, आर्थिक माहिती किंवा खासगी चॅट सुरक्षित आहे. सायबर तज्ज्ञांच्या मते, डेटिंग अॅप्सवर युजर्सची अतिशय वैयक्तिक माहिती असते जसे की फोटो, लोकेशन, संपर्क तपशील, आवडीनिवडी आणि खासगी संभाषण. त्यामुळे असे प्लॅटफॉर्म्स सायबर गुन्हेगारांसाठी आकर्षणाचे केंद्र ठरतात. शिवाय, अनेक युजर्स एकच पासवर्ड वेगवेगळ्या अॅप्सवर वापरत असल्याने धोका आणखी वाढतो. तज्ज्ञांनी युजर्सना सल्ला दिला आहे की, मजबूत पासवर्ड वापरणे, दोन-स्तरीय सुरक्षा (Two-Factor Authentication) सुरू ठेवणे आणि संशयास्पद ईमेल्स किंवा लिंक्सवर क्लिक न करणे अत्यंत आवश्यक आहे. लहानशी माहितीही भविष्यात फसवणूक किंवा ओळख चोरीसाठी वापरली जाऊ शकते, त्यामुळे सतर्क राहणे गरजेचे आहे.
