Karnataka Politics | कर्नाटकात सत्ता बदल होणार असल्याची चर्चा पुन्हा एकदा सुरू झाली आहे. यातच आता उपमुख्यमंत्री डी. के. शिवकुमार २१ नोव्हेंबर रोजी मुख्यमंत्रिपदाची जबाबदारी हाती घेणार असल्याची चर्चा आहे.

याबाबत कर्नाटकचे मुख्यमंत्री सिद्धरामय्या यांनी शुक्रवारी एका पत्रकाराने राज्यातील नेतृत्व बदलाबाबत प्रश्न विचारताच ते संतापल्याचे पाहायला मिळाले. सिद्धरामय्या यांनी उपमुख्यमंत्री डी.के. शिवकुमार नोव्हेंबरमध्ये मुख्यमंत्री म्हणून पदभार स्वीकारतील अशा अफवांना नाकारले.

पत्रकाराने ‘२१ नोव्हेंबर रोजी शिवकुमार मुख्यमंत्री होणार, यात किती तथ्य आहे?’ असा प्रश्न विचारताच मुख्यमंत्री सिद्धरामय्या संतापले. मोठ्या आवाजात उत्तर देत त्यांनी म्हटले, ‘तुम्ही मला सांगितले का? तुम्हाला कसे कळले? कोणत्या वर्तमानपत्रात पाहिले, वाचले तुम्ही? मी सर्व वर्तमानपत्रे वाचली, पण मला असं काही दिसलं नाही.’ या तीव्र प्रतिक्रियेनंतर सिद्धरामय्या आणि शिवकुमार यांच्यातील सत्तासंघर्ष पुन्हा एकदा समोर आले आहे.

सिद्धरामय्या सरकारला अडीच वर्षे पूर्ण होणार

सिद्धरामय्या यांच्या नेतृत्वाखालील काँग्रेस सरकार २० नोव्हेंबर रोजी अडीच वर्षे पूर्ण करेल. मे २०२३ मध्ये विधानसभा निवडणूक निकालानंतर मुख्यमंत्री पदासाठी दोन्ही नेत्यांमध्ये प्रचंड चुरस पाहायला मिळाली होती. काँग्रेसच्या उच्चाधिकाऱ्यांनी अखेर शिवकुमार यांना उपमुख्यमंत्री पद स्वीकारण्यास मनवले होते.

त्यावेळी असे म्हटले गेले होते की सिद्धरामय्या अडीच वर्षे मुख्यमंत्री राहतील आणि उरलेल्या अडीच वर्षांसाठी शिवकुमार मुख्यमंत्री पद स्वीकारतील. मात्र काँग्रेसकडून याची कधीही अधिकृत पुष्टी करण्यात आली नव्हती. त्यामुळे आता हायकमांड पातळीवर मुख्यमंत्रिपद बदलाची चर्चा किती गांभीर्याने घेतली जाते, याकडे सर्वांचे लक्ष लागले आहे.

हेही वाचा : 

भर पावसात नांदोशी येथे जन आक्रोश आंदोलन: मूलभूत सुविधांसाठी नागरिकांचा महापालिका प्रशासनाविरोधात एल्गार