Santosh Deshmukh Case । Walmik Karad : सरपंच संतोष देशमुख हत्या प्रकरणात मंगळवारी बीडच्या जिल्हा व सत्र न्यायालयात सुनावणी झाली. सरकारी पक्षाचे वकील उज्वल निकम यांच्या उपस्थितीत आजचा युक्तिवाद झाला. संतोष देशमुख हत्या प्रकरणात आरोप निश्चिती बाबत पुरेसे पुरावे असून आरोप निश्चिती करून घ्यावी, असा अर्ज उज्वल निकम यांनी न्यायालयाला सादर केला. वाल्मिक कराडच्या वकीलांकडून अद्याप सरकारी पक्षाकडून डिजिटल पुरावे मिळाले नसल्याचे म्हणणे मांडण्यात आले. तर वाल्मिक कराडच्या दोष मुक्तीच्या अर्ज न्यायालयात प्रस्तावित केला आहे. या दोन्ही बाबींवर १७ जून रोजी सुनावणी होणार आहे. न्यायालयात सुनावणी झाल्यानंतर वाल्मिक कराडचे वकील विकास खाडे आणि मोहन यादव यांनी माध्यमांशी संवाद साधत या संदर्भात माहिती दिली. कराडच्या डिस्चार्ज अप्लिकेशनवर सुनावणी अपेक्षित होती, पण ती झाली नाही. आज काही किरकोळ अर्जावर सरकारी पक्षाचे व आमचे म्हणणे मांडले गेले. आम्ही डिजिटल पुरावे मागत होतो, ते कोर्टात सीलबंद पद्धतीने सादर करणार असल्याचे सरकारी पक्षाने सांगितले. ज्यावेळेस पुरावे सादर करतील त्यावेळेस त्यावर चर्चा होईल. सरकारी पक्षाकडून विरोधी आरोपीच्या वकिलांना कागदपत्राची पूर्तता अद्याप झालेली नाही, असे वाल्मिक कराडचे वकील विकास खाडे यांनी स्पष्ट केले. वाल्मिक कराडला मकोकाचा नियम लागू होतो का? यासंदर्भात १७ तारखेला निर्णय होईल. १७ तारखेला दोन्ही पक्षांचे ऐकून न्यायालय निर्णय देईल. आरोपी वाल्मिक कराडची सर्व स्थावर मिळकत चल आणि अचल जप्तीसाठी अर्ज दिला होता. त्यांच्या वकिलांनी न्यायालयात उत्तर दिले आहे. त्यावर देखील १७ तारखेला सुनावणी होईल. या खटल्यात मोकोकामधून दोषमुक्त करावे, असा वाल्मिक कराडचा अर्ज आहे. यावर पहिले सुनावणी घेण्यात यावी. बचाव पक्षाच्या या मागणीवर आम्ही कोणतीही हरकत नसल्याची माहिती सरकारी वकील उज्जवल निकम यांनी दिली.
