TOP 10 News : 1) पवनराजे निंबाळकर हत्याप्रकरणातील सर्व आरोपी निर्दोष ; ओमराजे निंबाळकर सर्वोच्च न्यायालयात जाणार

राज्यातील बहुचर्चित आणि तब्बल 20 वर्षांपासून न्यायालयात प्रलंबित असलेल्या पवनराजे निंबाळकर दुहेरी हत्याकांड प्रकरणात मुंबई सत्र न्यायालयाने मोठा निकाल दिलाय. न्यायालयाने मुख्य आरोपी पद्मसिंह पाटील यांच्यासह सर्व आरोपींची निर्दोष मुक्तता केलीय. या धक्कादायक निकालानंतर धाराशिवचे खासदार ओमराजे निंबाळकर भावुक झाले. कलयुगात निराशाच पदरी पडते, पण वडील पवनराजे यांना नेमके मारले कोणी, असा प्रश्न त्यांनी उपस्थित केला.

न्यायालयाचा आदर करत या निर्णयाविरोधात सर्वोच्च न्यायालयात दाद मागणार असल्याचे त्यांनी स्पष्ट केले. तसेच, पुढील दोन दिवसांत राजकीय भूमिका जाहीर करणार आहे, उद्धव ठाकरे आणि आदित्य ठाकरे यांच्याबद्दल मी कधीही काहीही वाईट बोलणार नाही, अशी ग्वाही ओमराजेंनी दिली. 3 जून 2006 रोजी नवी मुंबईतील कळंबोली येथे पवनराजे निंबाळकर आणि त्यांच्या चालकाची गोळ्या झाडून निर्घृण हत्या करण्यात आली होती.

2) परभणी जिल्ह्यात मंदिराचे छत कोसळून भीषण दुर्घटना; 7 भाविकांचा मृत्यू, अनेक जखमी

मानवत तालुक्यातील प्रसिद्ध यशवाडी देवस्थान येथे शनिवारी दुपारी एक भीषण दुर्घटना घडली. मंदिरासमोरील बांधकाम सुरू असलेल्या सभामंडपाचे छत आणि पिलर अचानक कोसळल्याने 7 भाविकांचा मृत्यू झाला, तर ३० हून अधिक जण ढिगाऱ्याखाली दबले गेले. शनिवार असल्याने मंदिरात कीर्तन व महाप्रसादासाठी हजारो भाविकांची मोठी गर्दी झाली होती.

या दुर्घटनेत ८ ते १० भाविक गंभीर जखमी झालेत. घटनेची माहिती मिळताच पोलीस आणि स्थानिक प्रशासनाने गावकऱ्यांच्या मदतीने युद्धपातळीवर बचावकार्य सुरू केले. खासदार संजय जाधव आणि आमदार डॉ. राहुल पाटील यांनी या घटनेवर तीव्र दुःख व्यक्त करत जखमींना तातडीने वैद्यकीय मदत पुरवण्याचे निर्देश दिलेत.

3) अमित शहांच्या हस्ते महालक्ष्मी मंदिर जीर्णोद्धाराचे भूमिपूजन; एकनाथ शिंदेंचीच खरी शिवसेना – अमित शहा

केंद्रीय गृहमंत्री अमित शहा यांनी कोल्हापूर दौऱ्यात करवीर निवासिनी महालक्ष्मी मंदिराच्या ऐतिहासिक जीर्णोद्धार आराखड्याचे भूमिपूजन केले. २८ हजार चौरस मीटर परिसराचा कायापालट करणाऱ्या या प्रकल्पात आधुनिक सुरक्षा व्यवस्था आणि ४१ उपमंदिरांचे जतन केले जाणार आहे.

पंतप्रधान मोदींच्या ‘विकास आणि विरासत’ मंत्राचा हा भाग असल्याचे मुख्यमंत्री देवेंद्र फडणवीस यांनी सांगितले. या सोहळ्यात अमित शहा यांनी राजकीय टोला लगावत, “आता कोणतीही फूट नसून एकनाथ शिंदेंचीच खरी शिवसेना आहे,” असे स्पष्ट केले.

4) वारकऱ्यांच्या सुविधेसाठी प्रशासनाची जंगी तयारी; यंदा 25 जुलैला आषाढी एकादशी

आषाढी वारीनिमित्त पालखी मार्गावर वारकऱ्यांसाठी जिल्हा परिषदेतर्फे चोख व्यवस्था करण्यात येतेय. यामध्ये २३ जर्मन हँगर शामियाने, २२० पाण्याचे टँकर, १५८ तात्पुरती उपचार केंद्रे आणि १२१ बाईक ॲम्बुलन्स तैनात राहतील. दिंडी प्रमुखांना ४५०० मेडिसिन किट्सचे वाटप केले जाईल. यासोबतच ५ हजार फिरती शौचालये, मोबाईल नेटवर्क टॉवर आणि सीसीटीव्ही यंत्रणा सज्ज करण्यात येतेय.

सोलापूर जिल्ह्याचे पालकमंत्री जयकुमार गोरे यांनी पुणे विभागीय आयुक्त कार्यालयातून पुणे, सातारा, सोलापूर व अहिल्यानगर जिल्ह्यांच्या नियोजनाचा आढावा घेतला. त्यांनी पालखी मार्गांची दुरुस्ती, स्वच्छता, रिंगण सोहळा व मुक्काम स्थळांची सुरक्षितता वेळेत पूर्ण करण्याचे निर्देश प्रशासनाला दिलेत. यावर्षी 25 जुलैला आषाढी एकादशी आहे.

5) NEET-UG पुनर्परीक्षेसाठी देशभरात ‘मॉक ड्रिल’; उद्या 22.79 लाख विद्यार्थी देणार परीक्षा

NEET-UG परीक्षेच्या पार्श्‍वभूमीवर नॅशनल टेस्टिंग एजन्सी (NTA) आज देशभरातील ५५१ शहरांमध्ये सराव चाचणी मॉक ड्रिल घेतले. उद्या, २१ जून रोजी होणाऱ्या या पुनर्परीक्षेसाठी २२ लाख ७९ हजारांहून अधिक उमेदवार बसणार असून, २ लाखांवर कर्मचारी तैनात आहेत. ३ मे रोजी झालेली परीक्षा पेपरफुटीच्या आरोपांनंतर रद्द करण्यात आली होती.

सुरक्षेसाठी प्रश्नपत्रिका वाहून नेणाऱ्या वाहनांचे जीपीएस ट्रॅकिंग आणि केंद्रांवर सीसीटीव्हीची त्रिस्तरीय यंत्रणा असेल. उमेदवारांना जुनी प्रवेशपत्रे चालणार नसून नवीन डाऊनलोड करावी लागतील. तसेच दिल्ली व तेलंगणामध्ये विद्यार्थ्यांना बस प्रवास मोफत असून, महाराष्ट्रात मुंबई लोकलचे मेगा ब्लॉक रद्द करण्यात आलेत.

6) इस्त्रायलचा लेबनानवर पुन्हा हल्ला; शुक्रवारीच झाली होती युद्धबंदीची घोषणा

 

इस्त्रायल आणि हिजबुल्लाह यांच्यात शुक्रवारीच युद्धबंदीची घोषणा झाली असताना, अवघ्या काही तासांतच इस्त्रायलने दक्षिण लेबनानवर पुन्हा भीषण हल्ले केलेत. या ताज्या हल्ल्यांमध्ये किमान पाच जणांचा मृत्यू झालाय. वृत्तानुसार, इस्त्रायली लढाऊ विमाने आणि ड्रोननी नबातीह परिसरात लागोपाठ बॉम्बवर्षाव केला, ज्यात अनेक निवासी इमारती आणि घरे उद्ध्वस्त झाली.

तसेच इस्त्रायली तोफखान्याकडूनही या भागावर मारा सुरूय. अमेरिका आणि इराणच्या मध्यस्थीने झालेल्या या करारात सर्व आघाड्यांवर युद्ध थांबवण्याचे निश्चित झाले होते. मात्र, इस्त्रायली लष्कराने युद्धबंदीला दुजोरा देऊनही, हल्ले सुरूच ठेवल्याने या भागात तणाव पुन्हा वाढलाय.

7) रेवती सुळे आणि सारंग लखानीचा शाही विवाहसोहळा संपन्न; शाहरुख खानची संगीत कार्यक्रमात हजेरी

राज्याचे ज्येष्ठ नेते शरद पवार यांची नात आणि खासदार सुप्रिया सुळे यांची कन्या रेवती सुळे आणि प्रसिद्ध उद्योगपती अरुण लखानी यांचा मुलगा सारंग लखानी यांचा शाही विवाहसोहळा आज २० जून रोजी संपन्न झाला. या विवाहसोहळ्यापूर्वी पार पडलेल्या संगीत समारंभाला बॉलिवूडचा किंग शाहरुख खानने खास हजेरी लावली होती.

यावेळी शाहरुखने ‘कुछ कुछ होता है’ चित्रपटातील ‘कोई मिल गया’ गाण्यावर रेवतीसोबत डान्स केला आणि आपली आयकॉनिक सिग्नेचर पोजही दिली. सध्या या लग्नसोहळ्याचे फोटो आणि व्हिडिओ सोशल मीडियावर प्रचंड व्हायरल होत आहेत. या विवाहसोहळ्याला राजकीय, उद्योग जगतासह सर्वच क्षेत्रांतील मान्यवरांची मोठी उपस्थिती होती.

8) iPhone 18 Pro Max भारतात महागण्याची शक्यता; पाहा संभाव्य किंमत आणि फीचर्स

Apple यावर्षी सप्टेंबर महिन्यात आपली नवी iPhone 18 सिरिज लाँच करण्यासाठी सज्ज झाले असून, यामध्ये iPhone 18 Pro Max ची किंमत मागील मॉडेलपेक्षा अधिक असण्याची शक्यता आहे. लीक झालेल्या माहितीनुसार, १२ जीबी रॅम आणि २५६ जीबी स्टोरेज असलेल्या या फोनची भारतातील किंमत ₹१,४९,९०० ते ₹१,५९,९०० दरम्यान असू शकते.

हा फोन साधारणपणे ११ सप्टेंबर २०२६ रोजी लाँच केला जाईल. या फोनमध्ये ६.९ इंचाचा सुपर रेटिना XDR OLED डिस्प्ले आणि शक्तिशाली A20 Pro चिपसेट मिळण्याची शक्यता आहे. फोटोग्राफीसाठी यात ४८ मेगापिक्सलचा ट्रिपल रिअर कॅमेरा सेटअप आणि २४ मेगापिक्सलचा फ्रंट कॅमेरा दिला जाऊ शकतो. तसेच यात ५४००mAh ची दमदार बॅटरी असण्याची शक्यता आहे. मात्र कंपनीने याबाबत अद्याप कोणतीही अधिकृत घोषणा केलेली नाही.

9) अभिनेत्री प्राजक्ता माळीने उद्घाटन केलेल्या मॉलवर धाड; कारवाईमुळे संपूर्ण परिसरात मोठी खळबळ

प्रसिद्ध मराठी अभिनेत्री प्राजक्ता माळी हिच्या हस्ते अवघ्या ४८ तासांपूर्वी, म्हणजेच १७ जून रोजी सिंधुदुर्ग जिल्ह्यातील कुडाळ येथे ‘आपला बाजार’ या भव्य मॉलचे मोठ्या थाटामाटात उद्घाटन करण्यात आले होते. मात्र, अन्न व औषध प्रशासनाचे आयुक्त तुकाराम मुंढे यांच्या आदेशानुसार पथकाने शुक्रवारी या मॉलवर अचानक थेट धाड टाकली.

या कारवाईमुळे संपूर्ण परिसरात मोठी खळबळ उडालीय. एफडीएच्या अधिकाऱ्यांनी मॉलमध्ये प्रवेश करताच ग्राहकांना बाहेर काढून मुख्य दरवाजे बंद केले. सध्या मॉलचे परवाने, अन्नपदार्थांचा साठा आणि कायदेशीर कागदपत्रांची कसून तपासणी सुरू आहे. दरम्यान, शहरातील उघड्यावरील चायनीज आणि बिर्याणी सेंटर्सवरही अशीच कडक कारवाई करण्याची मागणी नागरिकांमधून जोर धरतेय.

10) FIFA 2026: नेमारचे पुनरागमन, ब्राझीलला मोठा दिलासा; दुखापतीतून सावरून पुनरागमनासाठी सज्ज

फिफा विश्वचषक २०२६ मधील स्कॉटलंडविरुद्धच्या महत्त्वपूर्ण सामन्यापूर्वी ब्राझील संघासाठी एक आनंदाची बातमी समोर आलीय. संघाचा स्टार खेळाडू नेमार दुखापतीतून सावरून पुनरागमनासाठी सज्ज झाला असून तो पुढील सामन्यात निवडीसाठी उपलब्ध असेल, अशी माहिती मुख्य प्रशिक्षक कार्लो अँसेलोटी यांनी दिलीय.

दुखापतीमुळे नेमारला सुरुवातीच्या दोन सामन्यांना मुकावे लागले होते. दुसरीकडे, आघाडीचा विंगर राफिन्हा देखील दुखापतीमुळे संघाबाहेर गेल्याने ब्राझीलची चिंता वाढली होती. अशा कठीण प्रसंगी नेमारचे पुनरागमन संघाचे मनोबल वाढवणारे ठरेल. बाद फेरीत पोहोचण्याच्या दृष्टीने नेमारची उपस्थिती ब्राझीलसाठी अत्यंत महत्त्वाची मानली जातेय.