Ganeshotsav 2026 : श्रीमंत दगडूशेठ हलवाई सार्वजनिक गणपती ट्रस्ट आणि सुवर्णयुग तरुण मंडळाच्या वतीने यंदाच्या १३४ व्या गणेशोत्सवात वृंदावन येथील प्रेम मंदिराची प्रतिकृती साकारण्यात आली आहे. गणेश चतुर्थीला सोमवार (दि. १४ सप्टेंबर) रोजी सकाळी ११ वाजून ११ मिनिटांनी श्रींची प्रतिष्ठापना होणार आहे.

उत्तर प्रदेशातील वृंदावन येथील श्री राधावल्लभ मंदिराचे १८ वे तिलकायत अधिकारी श्रीहित मोहितमराल गोस्वामी महाराज यांच्या हस्ते हा विधी होईल. मंदिरावरील विद्युतरोषणाईचे उद्घाटन सायंकाळी ७ वाजता केंद्रीय मंत्री मुरलीधर मोहोळ यांच्या हस्ते होणार आहे.

प्रतिष्ठापनेपूर्वी सोमवारी सकाळी ८.३० वाजता मुख्य मंदिरापासून फुलांनी सजविलेल्या मयूर रथातून श्रींची आगमन मिरवणूक काढण्यात येणार आहे. या मिरवणुकीत गंधाक्ष ढोल-ताशा पथक, मयूर बँड, प्रभात बँड आणि दरबार बँड सहभागी होणार आहेत.

विविध प्रकारच्या आकर्षक फुलांनी मयूर रथ सजविण्यात येणार आहे. प्रतिष्ठापनेनंतर दुपारी १२ वाजल्यापासून उत्सव मंडपात भाविकांना श्रींचे दर्शन घेता येणार आहे.