बंगळुरू : कॉंग्रेसची सत्ता असणाऱ्या कर्नाटकमधील नेतृत्वाविषयीचा सस्पेन्स कायम आहे. अशात मुख्यमंत्रिपदाची आकांक्षा बाळगून असणारे उपमुख्यमंत्री डी.के.शिवकुमार यांनी शनिवारी सूचक वक्तव्य केले. त्यातून त्यांना कॉंग्रेस श्रेष्ठींच्या निमंत्रणाची प्रतीक्षा असल्याचे सूचित झाले. कर्नाटकमध्ये कॉंग्रेसच्या गोटात मागील काही दिवसांपासून मेजवान्यांचे सत्र सुरू आहे. त्यामुळे मुख्यमंत्री सिद्धरामय्या आणि शिवकुमार यांच्यातील नेतृत्वासाठीची रस्सीखेच संपलेली नसल्याचे मानले जात आहे.

संबंधित भोजन समारंभाच्या माध्यमातून दोन्ही नेत्यांचे समर्थक आमदार एकवटत असल्याचे दिसते. अशात सिद्धरामय्या यांनी शुक्रवारी मुख्यमंत्रिपदी कायम राहण्याचा विश्‍वास व्यक्त केला. कॉंग्रेस श्रेष्ठी त्यासाठी अनुकूल असल्याचा दावाही त्यांनी केला. त्या पार्श्‍वभूमीवर, पत्रकारांनी नेतृत्वबदलाविषयीचे प्रश्‍न शिवकुमार यांना विचारले. कॉंग्रेस श्रेष्ठींच्या भेटीसाठी सिद्धरामय्या आणि तुम्ही दिल्लीला जाणार आहात का, अशी विचारणाही पत्रकारांनी केली.

आम्हाला दोघांनाही केव्हा बोलावले जाणार ते पक्षश्रेष्ठींनी फोनवरून सांगितले आहे. आम्हाला योग्यवेळी बोलावले जाईल. आम्ही दोघेही जाऊ. आम्ही फोनकॉलची प्रतीक्षा करू, असे उत्तर शिवकुमार यांनी दिले. मी लपूनछपून काही करणार नाही. प्रसारमाध्यमांना सांगितल्याशिवाय काही करणार नाही, अशी मिश्‍कील टिप्पणीही त्यांनी केली. कर्नाटक सरकारने मागील महिन्यात निम्मा म्हणजे अडीच वर्षांचा कार्यकाळ पूर्ण केला. त्यामुळे त्या राज्यात कॉंग्रेसकडून मुख्यमंत्री बदल केला जाईल, असा अंदाज वर्तवणाऱ्या चर्चांनी जोर धरला आहे.

मुख्यमंत्री बदलाच्या शक्यतेने कर्नाटक कॉंग्रेसमध्ये सत्तासंघर्ष सुरू असल्याचे चित्रही समोर आले. त्यातून राजकीय संभ्रमाची स्थिती निर्माण झाली. संभ्रम संपवण्याच्या उद्देशातून सिद्धरामय्या आणि शिवकुमार यांनी एकमेकांच्या निवासस्थानी जात ऐक्याची ग्वाही दिली. मात्र, त्यानंतर मेजवान्यांचे सत्र सुरू झाल्याने मुख्यमंत्री बदलाविषयीच्या चर्चांना पुन्हा खतपाणी मिळाले आहे.